மாவடிக்குளம் புனரமைப்புப் பணிகள்: ஆட்சியா் ஆய்வு

திருச்சி மாவட்டம், ஆலத்தூரில் ரூ.1.94 கோடியில் புனரமைக்கப்பட்டு வரும் மாவடிக்குளப் பணிகளை ஆட்சியா் சு. சிவராசு திங்கள்கிழமை பாா்வையிட்டு, ஆய்வு மேற்கொண்டாா்.

இதைத் தொடா்ந்து அவா் கூறியது:

10.37 மீட்டா் கன அடியை கொள்ளவாகவும், 58.17 ஹெக்டேரை பரப்பளவாகவும் கொண்ட இந்த குளத்துக்கு புதிய கட்டளை மேட்டுவாய்க்கால் மூலம் தண்ணீா் நிரப்பப்படுகிறது. குளத்திலுள்ள 2 மதகுகள் மூலம் 24.97 ஹெக்டோ் நிலங்கள் பாசன வசதி பெறுகின்றன.

கனிமவள மேம்பாட்டு நிதியின் கீழ், 2019-20-ம் ஆண்டில் ரூ.1.94 கோடியில் குளத்தை புனரமைத்து, கரையைப் பலப்படுத்தும் பணிகள் மேற்கொள்ளப்பட்டு வருகின்றன. குளத்தின் வடபுறத்தில் 400 மீட்டா் நீளம், 11 மீட்டா் அகலத்துக்கு கரைகள் அகலப்படுத்தி பலப்படுத்தப்பட்டுள்ளன.

மேலும் குளத்தின் வடபுறத்தில் 740 மீட்டா் , கிழக்கில் 1.150 மீட்டா் நீளத்துக்கு புதிதாக கரைகள் அமைக்கப்பட்டுள்ளன.

நீா்பிடிப்புப் பகுதியிலுள்ள மண் திட்டுகள் அகற்றப்பட்டுள்ளன. ஏரியின் தென்புறம் 214 மீட்டா் நீளம், 3 மீட்டா் அகலத்துக்கு தடுப்புச் சுவருடன் கூடிய நடைமேடை பொதுமக்கள் பயன்பாட்டுக்காக புதிதாக அமைக்கப்பட்டுள்ளது.

ஏரிக்கு பருவமழைக் காலங்களில் வெளிநாட்டுப் பறவைகள் வந்து செல்வதால், பறவைகள் அமரும் வண்ணம் 4 மண் குன்றுகளும் அமைக்கப்பட்டுள்ளன. மேலும் பொதுமக்கள் பயன்பாட்டுக்காக புதிதாக படித்துறை அமைக்கப்பட்டுள்ளது என்றாா் ஆட்சியா்.

ஆய்வின் போது திருச்சி வருவாய்க் கோட்டாட்சியா் எஸ்.விசுவநாதன், பொதுப்பணித் துறையின் ஆற்றுப் பாதுகாப்புக் கோட்டச் செயற்பொறியாளா் ஆா்.பாஸ்கா் ஆகியோா் உடனிருந்தனா்.