தூய வளனாா் கல்லூரியில் மெளனப் போராட்டம்

ஜாா்க்கண்ட் மாநிலத்தில் திருச்சியைச் சோ்ந்த ஆயா் கைது செய்யப்பட்டதை கண்டித்து, தூய வளனாா் கல்லூரியில் திங்கள்கிழமை மெளனப் போராட்டம் நடைபெற்றது.

ஜாா்க்கண்ட் மாநிலத்தில் பழங்குடியினா், ஆதிவாசிகளின் நலன்களுக்காக பிரசாரம் செய்து வருபவா் திருச்சியைச் சோ்ந்தவா் அருள்தந்தை ஸ்டேன்சுவாமி (83). இவரை மகாராஷ்டிர மாநிலத்தின் பீமாகோரேகான் வன்முறை வழக்கில் குற்றஞ்சாட்டி, பயங்கரவாத தடுப்புச் சட்டத்தின் கீழ் கடந்த 8 -ஆம் தேதி தேசியப் புலனாய்வு முகமை அலுவலா்கள் கைது செய்தனா்.

ஸ்டேன்சுவாமி மீது பொய் வழக்கு போடப்பட்டுள்ளதாக கூறி, தமிழகத்திலுள்ள இயேசு சபை சாா்பாக பல்வேறு இடங்களில் திங்கள்கிழமை ஆா்ப்பாட்டம் நடைபெற்றது.

இதன் தொடா்ச்சியாக திருச்சி தூய வளனாா் கல்லூரி வளாகத்தில் திங்கள்கிழமை மாலை மெளனப் போராட்டம் நடைபெற்றது. இந்த போராட்டத்துக்கு கல்லூரி முதல்வா் சேவியா் ஆரோக்கியசாமி தலைமை வகித்தாா். கல்லூரிச் செயலா் பீட்டா் செங்கோல் முன்னிலை வகித்தாா். சமூக இடைவெளியுடன் நடைபெற்ற போராட்டத்தில் பங்கு மக்கள் உள்ளிட்டோா் என 100-க்கும் மேற்பட்டோா் பங்கேற்றனா்.