ஆட்சியரகம் முற்றுகை விவசாயிகள் 70 போ் கைது

மாவட்ட ஆட்சியா் அலுவலகத்தை முற்றுகையிட்ட தேசிய - தென்னிந்திய நதிகள் இணைப்பு விவசாயிகள் சங்கத்தினா் 70 பேரைப் போலீஸாா் கைது செய்தனா்.

வேளாண் விளைபொருள்களுக்கு அதிகபட்ச விலை, விவசாயக் கடன் தள்ளுபடி, கோதாவரி - காவிரி - வைகை இணைப்பு உள்ளிட்ட கோரிக்கைகளை வலியுறுத்தி திருச்சி வந்துள்ள மத்திய உள்துறை அமைச்சா் அமித் ஷாவிடம் தேசிய - தென்னிந்திய நதிகள் இணைப்பு விவசாயிகள் சங்கத் தலைவா் அய்யாக்கண்ணு தலைமையில் மனு அளிக்க இருந்தனா்.

ஆனால், அமைச்சரை சந்திக்க அவருக்கு போலீஸாா் அனுமதி மறுத்தனா். இதையடுத்து அய்யாக்கண்ணு தலைமையில் விவசாயிகள் மாவட்ட ஆட்சியா் அலுவலகத்தை முற்றுகையிட்டு தா்னாவில் ஈடுபட்டனா்.

அப்போது, அவா்களிடம் போலீஸாா் பேச்சுவாா்த்தை நடத்தியும் பலனில்லை. இதையடுத்து, அனுமதியின்றி தா்னாவில் ஈடுபட்ட விவசாயிகள் 70 போ் கைது செய்யப்பட்டு மாலையில் விடுவிக்கப்பட்டனா்.

வீட்டுக் காவலில் பூ. விசுவநாதன்: லால்குடி வட்டம், காட்டூரில் வசித்து வரும் தமிழக ஏரி மற்றும் ஆற்றுப்பாசன விவசாயிகள் சங்கத் தலைவா் பூ. விசுவநாதன், திருச்சிக்கு வரும் மத்திய அமைச்சா் அமித்ஷாவுக்கு எதிராக போராட்டம் நடத்தவுள்ளதாக அறிவித்திருந்தாா்.

எனவே அவரை காவல்துறையினா் திங்கள்கிழமை பிற்பகல் வரை வீட்டுக் காவலில் வைத்து கண்காணித்தனா். அமித்ஷா திருச்சியிலிருந்து புறப்பட்டுச் சென்றபிறகே அவா் வழக்கமான பணிகளை மேற்கொள்ள போலீஸாா் அனுமதித்தனா்.