பொதுமக்கள்-போலீஸார் கலந்துரையாடல் கூட்டம்

அரியலூர் மாவட்டம் திருமானூர் அருகேயுள்ள சாத்தமங்கலம் கிராமத்தில் பொதுமக்கள் - காவல்துறை நல்லுணர்வு கலந்துறையாடல் கூட்டம் சனிக்கிழமை நடைபெற்றது. 
மாவட்டக் காவல்துறை கண்காணிப்பாளர் அபிநவ்குமார் உத்தரவின்பேரில் நடைபெற்ற கூட்டத்துக்கு மாவட்டக் காவல் துணைக் கண்காணிப்பாளர் மோகன்தாஸ் தலைமை வகித்தார். துணை கண்காணிப்பாளர் (பயிற்சி) மேகலா முன்னிலை வகித்தார்.  
கூட்டத்தில் மாவட்ட துணைக் காவல் கண்காணிப்பாளர் மோகன்தாஸ் பொதுமக்களிடையே பேசியது: 
பொதுமக்களாகிய நீங்களும், காவல்துறையும் எப்போதும் நல்லுணர்வுடன் இருக்க வேண்டும். மேலும், உங்களது சட்டரீதியான குறைகளை எங்களிடம் எப்போது வேண்டுமானாலும் தெரியப்படுத்தலாம்.மேலும், 18 வயதுக்குட்பட்ட பெண் குழந்தைகள் மற்றும் பெண்களுக்கு எதிராக பாலியல் குற்றங்களைத் தடுக்க அரசு பல நடவடிக்கைகளை மேற்கொண்டு வருகிறது.
பெண் குழந்தைகளுக்கு தொடுதல் குறித்து பெற்றோர்அவசியம் சொல்லித் தர வேண்டும். மேலும், குழந்தைகள் சொல்லும் கருத்துகளை பெற்றோர் தடுக்கக் கூடாது. அதுபோல், இருசக்கர வாகனங்களில் செல்லும்போது அவசியம் தலைக்கவசம் அணிந்து செல்ல வேண்டும் என்றார்.அப்போது வெளியூர்களில் படிக்கும்  சாத்தமங்கலத்தை சேர்ந்த மாணவ,மாணவிகள்  தினமும் அரசு பேருந்துகளில் சென்று வருகிறோம். ஆனால் எங்களது ஊரில் அரசு பேருந்துகள் நிற்பதில்லை என்றனர்.
இதற்கு உரிய நடவடிக்கை எடுக்கப்படும் என துணைக் காவல் கண்காணிப்பாளர் மோகன்தாஸ் தெரிவித்தார். முன்னதாக கீழப்பழுவூர் காவல் நிலைய உதவி ஆய்வாளர் சுப்பையா வரவேற்றார்.