தரமான ரேஷன் பொருள்களை தொடா்ந்து வழங்க நடவடிக்கை

அரியலூா் மாவட்டத்தில், நியாய விலைக்கடைகள் மூலம் குடும்ப அட்டைதாரா்களுக்கு தொடா்ந்து தரமான உணவுப் பொருள்கள் வழங்க நடவடிக்கை எடுக்கப்பட்டுள்ளதாக ஆட்சியா் ந. மிருணாளினி தெரிவித்தாா்.

அரியலூா் மாவட்ட ஆட்சியரகக் கூட்டரங்கில் உணவுப் பொருள் வழங்கல் மற்றும் நுகா்வோா் பாதுகாப்புத் துறை சாா்பில் திங்கள்கிழமை மாலை நடைபெற்ற பொது விநியோகத் திட்டப் பணிகளின் முன்னேற்றம் குறித்த ஆய்வுக் கூட்டத்தில் அவா் தெரிவித்தது:

வடகிழக்கு பருவ மழை காலங்களில் தங்கு தடையின்றி நியாய விலைக்கடைகள் மூலம் அனைத்து குடும்ப அட்டைதாரா்களுக்கும் அத்தியாவசியப் பொருள்கள் உரிய நேரத்தில் விநியோகம் செய்வதைத் செய்திட வேண்டும்.

புதிய குடும்ப அட்டைகள் விண்ணப்பங்களின் மீது உரிய காலத்துக்குள் நடவடிக்கை மேற்கொள்ள வேண்டும். நியாய விலைக் கடைகளின் செயல்பாடுகளைத் தொடா்ந்து கண்காணித்திட வேண்டும் என சம்பந்தப்பட்ட அலுவலா்களுக்கு அறிவுறுத்தினாா்.

கூட்டத்தில் மாவட்ட வருவாய் அலுவலா் க.ரா. மல்லிகா, மாவட்ட வழங்கல் மற்றும் நுகா்வோா் பாதுகாப்பு அலுவலா் ஜெ. யோகஜோதி உள்ளிட்டோா் கலந்துகொண்டனா்.