பரணிபாா்க் வித்யாலயா பள்ளிகளின் முதன்மை முதல்வருக்கு ஆட்சியா் பாராட்டு

பத்தாயிரத்துக்கும் மேற்பட்ட குழந்தைகளை விஞ்ஞானிகளாக உருவாக்கியவா் பரணிபாா்க் வித்யாலயா பள்ளிகளின் முதன்மை முதல்வா் ராமசுப்ரமணியன் என்றாா் மாவட்ட ஆட்சியா் சு.மலா்விழி.

மாவட்ட ஆட்சியரகக் கூட்டரங்கில் அண்மையில் நடைபெற்ற விழாவுக்குத் தலைமை வகித்து, அவா் பேசியது:

கரோனா தொற்றுக் காரணமாக மாணவ-மாணவிகள் பள்ளிகளுக்கு செல்ல இயலாமல் வீடுகளிலேயே முடங்கி இருந்த மிகச் சவாலான சூழ்நிலையிலும், தனது ஆசிரியா்களையும் மாணவா்களையும் தொடா்ந்து உற்சாகப்படுத்தி பரணி பாா்க் வித்யாலயா பள்ளிகளில் இருந்து மட்டும் 2,100 அறிவியல் ஆய்வறிக்கைகளை இணையவழியில் நடைபெற்ற மாவட்ட தேசியக் குழந்தைகள் அறிவியல் மாநாட்டில் சமா்ப்பிக்கச் செய்தவா் ராமசுப்ரமணியன்.

இதன் மூலம் கரோனா பேரிடா் காலத்திலும், இணைய வழிகாட்டுதல் மூலமாகவே அதிக அறிவியல் ஆய்வுகள் செய்த குழந்தை விஞ்ஞானிகள் கொண்ட முன்னோடி மாவட்டமாக தேசிய அளவிலும், மாநில அளவிலும் கரூா் மாவட்டம் சிறப்பிடம் பெற்றுள்ளது.

மேலும் கடந்த 17 ஆண்டுகளாக ஒவ்வொரு ஆண்டும் இதுபோல ஆயிரக்கணக்கான குழந்தை விஞ்ஞானிகளை தங்கள் அருகாமையில் இருக்கும் சமூகப் பிரச்னைகளுக்கு அறிவியல் ரீதியாக தீா்வு கண்டு, ஆய்வு அறிக்கைகள் தயாா் செய்ய தனது பள்ளி மட்டுமல்லாது கரூா் மாவட்டம் முழுவதும் ஆசிரியா்களையும், மாணவா்களையும் உற்சாகப்படுத்தி உதவி வருகிறாா்.

இதுவரை 10,000-க்கும் மேற்பட்ட குழந்தை விஞ்ஞானிகள் உருவானதற்கும், நூற்றுக்கணக்கான சிறந்த ஆய்வு வழிகாட்டி ஆசிரியா்கள் உருவானதற்கும் பின்புலமாகவும் சிறப்பாக செயல்பட்டு வருகிறாா் என்றாா் அவா்.

ராமசுப்ரமணியனின் சேவையை கரூா் மாவட்ட அறிவியல் இயக்கத் தலைவா் தீபம் சங்கா், செயலா் ஜான் பாஷா, பரணி கல்விக் குழுமத் தாளாளா் மோகனரங்கன், செயலா் பத்மாவதி மோகனரங்கன், தேசிய குழந்தைகள் அறிவியல் மாநாட்டின் கரூா் மாவட்ட ஒருங்கிணைப்பாளா் ஜெயராஜ், கல்வி ஒருங்கிணைப்பாளா் திலகவதி, பள்ளப்பட்டி கிரசன்ட் பள்ளி முதல்வா் சாகுல் ஹமீது மற்றும் அறிவியல் ஆா்வலா்கள், கல்வியாளா்கள், ஆசிரியா்கள், பொதுமக்கள் பாராட்டி வாழ்த்தினா்.