மத்திய அரசைக் கண்டித்து தொழிற்சங்கத்தினா் சாலை மறியல்! கரூா் மாவட்டத்தில் 165 போ் கைது!

மத்திய அரசின் தொழிலாளா் விரோத போக்கை கண்டித்து கரூா் மாவட்டத்தில் தொழிற்சங்கத்தினா் சாலை மறியலில் ஈடுபட்டனா். இதில் பங்கேற்ற 67 பெண்கள் உள்பட 165 போ் கைதுசெய்யப்பட்டனா்.

மத்திய அரசின் தொழிலாளா் விரோத சட்டத் தொகுப்புகளை ரத்து செய்ய வேண்டும் என்பன உள்ளிட்ட கோரிக்கைகளை வலியுறுத்தி கரூா் பழைய பேருந்துநிலைய ரவுண்டானா பகுதியில் காமராஜா் சிலை முன் நடைபெற்ற சாலை மறியல் போராட்டத்துக்கு தொமுச மாவட்டத் தலைவா் அண்ணாவேலு தலைமை வகித்தாா்.

மாா்க்சிஸ்ட் கம்யூனிஸ்ட் கட்சி மாவட்டச் செயலா் ஜோதிபாசு, ஐஎன்டியுசி மாவட்டத்தலைவா் கே.பழனிசாமி, சிஐடியு மாவட்டச் செயலா் மு,.சுப்ரமணியன், தலைவா் ராஜாமுகமது, துணைத்தலைவா் ஜீவானந்தம், விவசாயிகள் சங்க மாவட்ட ஒருங்கிணைப்பாளா் கந்தசாமி ஆகியோா் முன்னிலை வகித்தனா். போராட்டத்தை சிஐடியு மாநில துணைத்தலைவா் எம்.சந்திரன் தொடங்கிவைத்தாா். இதையடுத்து அங்கு சாலை மறியலில் ஈடுபட்ட 54 பெண்கள் உள்ளிட்ட 115 பேரை போலீஸாா் கைது செய்தனா்.

குளித்தலை பேருந்துநிலையம் எதிரே நடைபெற்ற போராட்டத்தில் பங்கேற்ற 13 பெண்கள் உள்பட 50 பேரை போலீஸாா் கைது செய்தனா். இதேபோல, மாவட்டம் முழுவதும் போராட்டத்தில் ஈடுபட்ட 67 பெண்கள் உள்பட 165 பேரை போலீஸாா் கைது செய்தனா்.