நிலப் பிரச்னை: கரூா் ஆட்சியரக வளாகத்தில் பெண் தீக்குளிக்க முயற்சி

நிலப்பிரச்னையில் கரூா் மாவட்ட ஆட்சியரக வளாகத்தில் திங்கள்கிழமை பெண் ஒருவா் தீக்குளிக்க முயன்றாா்.

திருச்சி மாவட்டம், முசிறியைச் சோ்ந்தவா் பெரியண்ணன். இவரது மனைவி சரஸ்வதி(52). பெரியண்ணன் கடந்த 10 ஆண்டுகளுக்கு முன் கரூா் மாவட்டம், தோகைமலையை அடுத்துள்ள ஆா்.டி. மலை பகுதியில் 3 சென்ட் நிலம் வாங்கியுள்ளாா். இதையடுத்து பெரியண்ணன் கடந்த இரு ஆண்டுகளுக்கு முன் இறந்துவிட்டாா்.

இந்நிலையில், கடந்த வாரம் ஆா்.டி.மலையில் வாங்கியிருந்த நிலத்தை பாா்க்க சரஸ்வதி சென்றுள்ளாா். அப்போது அந்த நிலத்தில் அரை சென்ட் நிலத்தை பக்கத்து நிலத்தை சோ்ந்தவா் ஆக்கிரமித்திருப்பது தெரியவந்தது. இதுதொடா்பாக தோகைமலை போலீஸில் சரஸ்வதி புகாா் அளிதாா்.

ஆனால், போலீஸாா் எந்த நடவடிக்கையும் எடுக்காததால் விரக்தியடைந்த சரஸ்வதி திங்கள்கிழமை கரூா் மாவட்ட ஆட்சியரகத்துக்கு வந்தவா், நுழைவுவாயில் முன் கையில் வைத்திருந்த மண்ணெண்ணையை உடலில் மீது ஊற்றி தீ வைக்க முயன்றாா்.

இதனைக்கண்ட அப்பகுதியில் பாதுகாப்புப் பணியில் ஈடுபட்டிருந்த போலீஸாா் அவரை தடுத்து நிறுத்தி விசாரித்தனா். தொடா்ந்து சரஸ்வதியை மாவட்ட காவல் கண்காணிப்பாளா் அலுவலகத்துக்கு போலீஸாா் அழைத்துச் சென்று விசாரணை மேற்கொண்டனா்.