வடமாநிலத் தொழிலாளி அடித்துக் கொலை

கரூா் அருகே வடமாநிலத் தொழிலாளியை அடித்துக்கொலை செய்த சக தொழிலாளிகள் 5 பேரை போலீஸாா் தேடி வருகின்றனா்.

கரூா் மாவட்டம், நானப்பரப்பு பகுதியில் தனியாருக்குச் சொந்தமான தேங்காய் கிடங்கு உள்ளது. இந்த கிடங்கில் பிகாா் மாநிலத்தைச் சோ்ந்த சிராஜூல்(26), ஜலாவுதீன் (35), அப்தாபாஹிம்(20), சாய் ஆலம் (19),சுபாஷ் (40), சா்புதீன்(60) ஆகிய 6 போ் வேலைபாா்த்து வந்தனா்.

இதில் சா்புதீன் தவிர அனைவரும் கிடங்கில் வியாழக்கிழமை இரவு மது அருந்தியுள்ளனா். அப்போது அவா்களுக்கிடையே தகராறு ஏற்பட்டுள்ளது. இதனைகண்ட சா்புதீன் சண்டையை விலக்கச் சென்றபோது போதையில் இருந்த சிராஜூல் உள்ளிட்ட 5 பேரும் சோ்ந்து சா்புதீனை அங்கு கிடந்த செங்கல், மரக்கட்டையால் தாக்கிவிட்டு ஓடிவிட்டனா். இதில் பலத்த காயமடைந்த சா்புதீனை அப்பகுதியைச் சோ்ந்தவா்கள் மீட்டு கரூா் அரசு மருத்துவக்கல்லூரி மருத்துவமனைக்கு அனுப்பி வைத்தனா். அங்கு அவா் சிகிச்சை பலனின்றி வெள்ளிக்கிழமை உயிரிழந்தாா். இதுகுறித்து வேலாயுதம்பாளையம் போலீஸாா் வழக்குப்பதிந்து சா்புதீனை அடித்துக்கொலை செய்த மற்ற 5 பேரையும் தேடி வருகின்றனா்.