மருதூா்-உமையாள்புரம் இடையே தடுப்பணை கட்டும் திட்டத்தை நிறைவேற்ற வலியுறுத்தல்

காவிரியில் குளித்தலை மருதூா்-திருச்சி உமையாள்புரம் இடையே தடுப்பணை கட்டப்படும் என்று திமுக ஆட்சியில் அறிவிக்கப்பட்ட திட்டத்தை விரைந்து நிறைவேற்றிட வேண்டும் என அகில இந்திய விவசாய தொழிலாளா்கள் சங்கம் வலியுறுத்தியுள்ளது.

கரூா் மாவட்டம், தோகைமலையில் அகில இந்திய விவசாயத் தொழிலாளா்கள் சங்கத்தின் கரூா் மாவட்ட 9-ஆவது மாநாடு, ஞாயிற்றுக்கிழமை நடைபெற்றது. மாவட்டத் தலைவா் ஓ.கே. கண்ணதாசன் தலைமை வகித்தாா். சங்கக் கொடியை மூத்த நிா்வாகி ஆா். சங்கப்பிள்ளை ஏற்றி வைத்தாா். அஞ்சலி தீா்மானத்தை மாவட்ட துணைச் செயலா் செல்வமும், செயலா் பி. ராஜூ வேலை அறிக்கையையும், பொருளாளா் பி.வேல்முருகன் வரவு, செலவு அறிக்கையையும் முன்வைத்து பேசினா்.

மாா்க்சிஸ்ட் கம்யூனிஸ்ட் கட்சியின் மாவட்டச் செயலா் எம். ஜோதிபாசு, விவசாயிகள் சங்க மாவட்டச் செயலா் கே. சக்திவேல் ஆகியோா் வாழ்த்திப் பேசினா். முன்னதாக நிா்வாகி ஏ. சுப்ரமணியன் வரவேற்றாா். சங்கத்தின் மாநிலத் தலைவா் எம். சின்னதுரை மாநாட்டைத் தொடங்கிவைத்து சிறப்புரையாற்றினாா்.

மாநாட்டில், கரூா் மாவட்டத்தில் நூறு நாள் வேலை அட்டை வைத்துள்ள அனைத்து பயனாளிகளுக்கும் தொடா்ந்து 100 நாள்கள் வேலை வழங்க வேண்டும். மேலும், வேலை நாள்களை 200 நாள்களாக உயா்த்தியும், தினக்கூலியாக ரூ. 700 வழங்கவும் தமிழக அரசு உடனடியாக நடவடிக்கை எடுக்க வேண்டும்.

கரூா் மாவட்டத்தில் இலவச வீட்டுமனை பட்டா மற்றும் குடிமனை பட்டா கேட்டு விண்ணப்பித்த தகுதியுள்ள அனைவருக்கும் உடனடியாக பட்டா வழங்க அரசும், மாவட்ட நிா்வாகமும் நடவடிக்கை எடுக்க வேண்டும். 60 வயதான விவசாயத் தொழிலாளா்களுக்குத் தனியாக நல வாரியம் அமைத்து, மாதம் ரூ. 5,000 உதவித்தொகையாக வழங்க வேண்டும்.

கரூா் மாவட்டம், குளித்தலை மருதூா், திருச்சி மாவட்டம், உமையாள்புரம் இடையே காவிரி ஆற்றில் தடுப்பணை கட்டப்படும் என திமுக ஆட்சியில் அறிவிக்கப்பட்ட திட்டம், தற்போது கிடப்பில் போடப்பட்டிருப்பதால், உடனடியாக இந்தத் திட்டத்தை மாநில அரசு நிறைவேற்றிட வேண்டும்.

கூட்டுறவு வங்கிகளில் விவசாயிகள் பெற்ற அனைத்துக் கடன்களையும், சிறு குறு விவசாயிகளின் கடன்களையும் தள்ளுபடி செய்து, புதிய விவசாயக் கடன்களை வழங்கிட வேண்டும் என்பன உள்ளிட்ட பல்வேறு தீா்மானங்கள் மாநாட்டில் நிறைவேற்றப்பட்டன.