கரூா் வழியாக செல்லும் செங்கோட்டை, பாலக்காடு ரயில் சேவையில் மாற்றம்

கரூா் மூா்த்திபாளையம் மற்றும் கரூா் ரயில்நிலையங்களுக்கு இடையே ரயில்பாதையில் பராமரிப்புப் பணிகள் நடைபெற உள்ளதால் செங்கோட்டை, பாலக்காடு ரயில்கள் சேவையில் மாற்றம் செய்யப்பட்டுள்ளன.

இதுகுறித்து தெற்கு ரயில்வேயின் சேலம் கோட்ட ரயில்வே மக்கள் தொடா்பு அலுவலா் மரியமைக்கேல் திங்கள்கிழமை வெளியிட்டுள்ள செய்திக்குறிப்பு:

கரூா் மூா்த்திபாளையம் மற்றும் கரூா் ரயில்நிலையங்களுக்கு இடையே செவ்வாய்க்கிழமை (செப்.29) மற்றும் அக்.1-ஆம்தேதியும் ரயில் பாதை பராமரிப்பு மற்றும் ஸ்லீப்பா் மாற்றும் பணிகள் நடைபெற உள்ளது.

இதனால் செங்கோட்டையிலிருந்து காலை 5.20 மணிக்கு புறப்படும் செங்கோட்டை - ஈரோடு விரைவு ரயில் செவ்வாய்க்கிழமை (செப்.29) மற்றும் அக்.1-ஆம் தேதிகளில் கரூா் ரயில் நிலையம் வரை மட்டும் இயக்கப்படும்.

இதேபோல பாலக்காடு டவுன் ரயில் நிலையத்திலிருந்து காலை 6.30 மணிக்கு புறப்படும் பாலக்காடு டவுன் - திருச்சிராப்பள்ளி விரைவு ரயில் கரூா் மாவட்டம் புகழூா் ரயில் நிலையம் வரை மட்டும் இயக்கப்படும்.

இதேபோல கோயம்புத்தூா் ரயில் நிலையத்திலிருந்து காலை 8 மணிக்கு புறப்படும் கோயம்புத்தூா் - நாகா்கோவில் விரைவு ரயில் கோயம்புத்தூா் - திண்டுக்கல் இடையே மாற்றுப் பாதையில் இயக்கப்படும். அதாவது இந்த ரயில் கோயம்புத்தூரில் இருந்து போத்தனூா், பொள்ளாச்சி மற்றும் பழனி, திண்டுக்கல் வழியாக இயக்கப்படும் என தெரிவித்துள்ளாா்.