"மாணவிகளுக்கு படிப்புடன் சமூக அக்கறையும் அவசியம்'

மருத்துவத் துறை மாணவிகளுக்கு படிப்போடு சமூக அக்கறையும் அவசியம் என்றார் அஜய் எலும்பு மூட்டு மருத்துவமனை நிர்வாக இயக்குநர் டாக்டர் கே. அறிவழகன்.

பெரம்பலூர் லட்சுமி இன்ஸ்டிடியூட் ஆப் பாரா மெடிக்கல் சயின்ஸ் கல்லூரியில் மாணவிகளுக்கான டிஜிட்டல் வகுப்பறையை சனிக்கிழமை திறந்து வைத்து அவர் மேலும் பேசியது: 

   பிறக்கும் போதே யாரும் எதையும் தெரிந்து கொண்டு வருவதில்லை. "கற்க கசடு அற' என்பதற்கு இணங்க மாணவிகள் கேள்வி கேட்கும் திறனை வளர்த்துக் கொள்ள வேண்டும். படிப்பது மட்டுமின்றி, சமூகத்தில் நடைபெறும் நிகழ்வுகள் குறித்த சிந்தனையும் மாணவிகளுக்கு வேண்டும். மேலும், பெண்களுக்கான உரிமைகள் குறித்து தெரிந்து வைத்திருக்க வேண்டும்.

ஒவ்வொரு நாள் பாடத்தையும், அன்றைய தினமே படித்து விட வேண்டும். மருத்துவத் துறையை தேர்ந்தெடுக்கும் மாணவிகள் இந்தச் சமூகம் சுகாதார அளவீடுகளில் முன்னேற்றம் பெற தங்களால் இயன்ற சேவையைப் புரிய வேண்டும் என்றார் அவர். தொடர்ந்து, மனிதவள மேம்பாட்டு பயிற்சியாளர் எஸ். வைரமணி பயிற்சி அளித்தார்.

  விழாவுக்கு லட்சுமி இன்ஸ்டிடியூட் ஆப் பாரா மெடிக்கல் சயின்ஸ் கல்லூரி தாளாளர் சி. கருணாகரன் தலைமை வகித்தார். கல்லூரி முதல்வர் ஆ. தங்கராசு முன்னிலை வகித்தார். மருத்துவமனை நிர்வாக இயக்குநர் டாக்டர் ஜெயலட்சுமி நன்றி கூறினார்.