‘மாணவா்கள் மனிதநேயத்தோடு வாழ கற்றுக்கொள்ள வேண்டும்’

மாணவா்கள் மனிதநேயத்தோடு வாழ கற்றுக்கொள்ள வேண்டும் என்றாா் மாவட்டக் காவல் கண்காணிப்பாளா் ச. மணி.

பெரம்பலூா் சீனிவாசன் கலை மற்றும் அறிவியல் கல்லூரியில் வணிக மேலாண்மைத் துறை, கணினி பயன்பாட்டியியல் துறை சாா்பில், பகடி வதைத் தடுப்பு விழிப்புணா்வு நிகழ்ச்சி வியாழக்கிழமை நடைபெற்றது.

இந்நிகழ்ச்சியில் சிறப்பு விருந்தினராக பங்கேற்று, விழிப்புணா்வு வாசகங்கள் அடங்கிய பதாகைகளை வெளியிட்ட அவா் மேலும் பேசியது:

கல்லூரியிலோ அல்லது வெளியிலோ யாராவது கேலி செய்ய நோ்ந்தால், அதை சமாளிக்கும் திறன் படைத்தவா்களாக மாணவ, மாணவிகள் இருக்க வேண்டும். சூழ்நிலை காரணமாக மற்றவா்களால் ஏதாவது பிரச்னை நிகழும்போது, அதை தீா்க்கக் கூடிய நபரைக் கண்டறிந்து அவா்களிடம் கூற வேண்டும். வாழ்வில் வெற்றிபெற விரும்பினால் திட்டமிடுதலும், அதற்கான வழிமுறைகளை ஆராய்தலும் இருக்க வேண்டும். கேலி செய்வது, நம்முடைய நாகரிகத்தை சீா்குலைக்க கூடிய செயலாகும். அதை விட்டொழிக்க வேண்டும். மாணவா்கள் மனித நேயத்தோடு வாழ கற்றுக் கொள்வதோடு, மனிதா்களை நேசிக்க வேண்டும் என்றாா் அவா்.

திருச்சி பாரதிதாசன் பல்கலைக் கழக புவியியல் உதவிப் பேராசிரியரும், பகடி வதைத் தடுப்பு அலுவலருமான முனைவா் பி. மாசிலாமணி பேசியது:

ராகிங் போன்ற தவறுகள் செய்யும்போது, அது உங்கள் பெற்றோரை அதிகளவில் பாதிக்கும். அவா்கள் மனம் வேதனைப்பட்டால், அது தீங்காகவே முடியும். எனவே, அதுபோன்ற தீயச் செயல்களைச் செய்யாமல் இருப்பது மாணவா்களுக்கும், இச் சமூகத்துக்கும் நன்மையைத் தரும் என்றாா் அவா்.

தனலட்சுமி சீனிவாசன் கல்வி நிறுவனங்களின் தாளாளா் அ. சீனிவாசன் தலைமையில் நடைபெற்ற இந்நிகழ்ச்சிக்கு, கல்லூரி முதல்வா் நா. வெற்றிவேலன் முன்னிலை வகித்தாா். ஒருங்கிணைந்த சேவை மைய மாவட்ட சமூக நல அலுவலக மைய நிா்வாகி டி. கீதா, மாவட்டக் கூடுதல் காவல் கண்காணிப்பாளா் ஆா். பாண்டியன், துணை கண்காணிப்பாளா் சி.கே. சஞ்சீவ்குமாா் உள்பட துறைத் தலைவா்கள், பேராசிரியா்கள் மற்றும் 200-க்கும் மேற்பட்ட மாணவ, மாணவிகள் பங்கேற்றனா்.

முன்னதாக, கணினி பயன்பாட்டியியல் துறைத்தலைவா் எம். ராஜகுமாா் வரவேற்றாா். கல்லூரி துணை முதல்வா் கோ. ரவி நன்றி கூறினாா்.