ஊட்டச்சத்து தோட்டம், மரத் தோட்டம் விழிப்புணா்வு விழா

பெரம்பலூா் மாவட்டம், வாலிகண்டபுரத்தில் உள்ள வேளாண் அறிவியல் மையத்தில் தேசிய அளவிலான ஊட்டச்சத்து தோட்டம் மற்றும் மரத் தோட்டம் அமைப்பது குறித்த விழிப்புணா்வு விழா வெள்ளிக்கிழமை நடைபெற்றது.

இந்நிகழ்ச்சிக்கு, முதுநிலை விஞ்ஞானியும், அறிவியல் மையத் தலைவருமான வே.எ. நேதாஜி மாரியப்பன் தலைமை வகித்தாா்.

விழாவில், சிறுதானிய சாகுபடிக்கான அரசின் திட்டங்கள் குறிதத்து மாவட்ட வேளாண் இணை இயக்குநா் ச. கருணாநிதியும், ஊட்டச்சத்து காய்கறி தோட்டம் அமைத்தல் மற்றும் அதன் முக்கியத்துவம் தொடா்பாக தோட்டக்கலை இணை இயக்குநா் அ.க. பாத்திமாவும், சிறுதானியத்தின் முக்கியத்துவம் குறித்து ரோவா் வேளாண் கல்லூரி முதல்வா் வள்ளியப்பனும், ஊட்டச்சத்தில் காய்கறிகளின் பங்கு குறித்து வேளாண் துணை இயக்குநா் ஏழுமலையும் பேசினா்.

ஒருங்கிணைந்த குழந்தைகள் நல வளா்ச்சித் திட்ட ஒருங்கிணைப்பாளா் அருணா வளா் இளம் பெண்களுக்கான ஊட்டச்சத்து முறை, ரோவா் வேளாண் கல்லூரி உழவியல் துறைத் தலைவா் வகாப் சிறுதானிய பயிா்களுக்கான உயரிய சாகுபடி தொழில்நுட்பங்கள், தொழில்நுட்ப வல்லுநா் ச. கோகிலவாணி சரிவிகித உணவு மற்றும் மனித ஆரோக்கியத்தில் சிறுதானியங்களின் பங்கு ஆகிய தலைப்புகளில் விளக்க உரையாற்றினா்.

தொடா்ந்து, விழாவில் பங்கேற்ற விவசாயிகளுக்கு 1,440 பழ மற்றும் மரக்கன்றுகள் வழங்கப்பட்டன. மேலும், வேளாண் அறிவியல் மைய வளாகத்தில் 200 பழக் கன்றுகள் நடப்பட்டன. இதில், பல்வேறு பகுதிகளைச் சோ்ந்த திரளான விவசாயிகள் பங்கேற்றனா்.

நிறைவாக, தொழில்நுட்ப வல்லுநா் மு. புனிதாவதி நன்றி கூறினாா்.