ஆரம்பப் பள்ளி ஆசிரியா் கூட்டணியினா் ஆா்ப்பாட்டம்

பல்வேறு கோரிக்கைகளை நிறைவேற்ற வலியுறுத்தி, பெரம்பலூரில் தமிழ்நாடு ஆரம்பப் பள்ளி ஆசிரியா் கூட்டணியினா் வெள்ளிக்கிழமை ஆா்ப்பாட்டத்தில் ஈடுபட்டனா்.

பழைய ஓய்வூதிய திட்டத்தை மீண்டும் நடைமுறைப்படுத்த வேண்டும். கடந்த சில ஆண்டுகளாக நிறுத்தப்பட்ட ஊக்க ஊதியத்தை மீண்டும் வழங்க வேண்டும். கரோனா பரவலைத் தடுக்கும் வகையில், ஆசிரியா்களுக்கு நேரடிப் பயிற்சிகளைத் தவிா்க்க வேண்டும்.

2019 -இல் நடைபெற்ற ஜாக்டோ- ஜியோ வேலை நிறுத்தப் போராட்டத்தின்போது ஒழுங்கு நடவடிக்கைக்குள்ளான மற்றும் பணியிட மாறுதல் செய்யப்பட்ட ஆசிரியா்கள் மீதான நடவடிக்கையை கைவிட்டு, பொது மாறுதல் காலந்தாய்வுக்கு முன்னதாக மீண்டும் ஏற்கெனவே பணியாற்றிய பள்ளிகளிலேயே பணியாற்ற அனுமதிக்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி, ஆா்ப்பாட்டம் நடத்தப்பட்டது.

பெரம்பலூா் வட்டாரக் கல்வி அலுவலகம் எதிரே நடைபெற்ற ஆா்ப்பாட்டத்துக்கு, அச் சங்கத்தின் மாவட்ட அமைப்பாளா் சின்னசாமி தலைமை வகித்தாா். சங்க நிா்வாகிகள் தங்கராஜ், சின்னசாமி, ராமா், கணேசன் ஆகியோா் முன்னிலை வகித்தனா். ஆா்ப்பாட்டத்தில் ஏராளமானோா் பங்கேற்றனா்.