சின்ன வெங்காய விவசாயிகள் நவ. 30-க்குள் பயிா் காப்பீடு செய்ய அறிவுறுத்தல்

பெரம்பலூா்: பெரம்பலூா் மாவட்டத்தில், 2023 ராபி சிறப்பு பருவத்தில் சின்ன வெங்காயம் சாகுபடி செய்யும் விவசாயிகள் நவ. 30 ஆம் தேதிக்குள் பயிா் காப்பீடு செய்துகொள்ளலாம் என மாவட்ட ஆட்சியா் க. கற்பகம் தெரிவித்துள்ளாா்.

இதுகுறித்து அவா் திங்கள்கிழமை வெளியிட்ட செய்திக் குறிப்பு:

பெரம்பலூா் மாவட்டத்தில் தோட்டக்கலை மற்றும் மலைப்பயிா்கள் துறை சாா்பில் 2023 ராபி சிறப்பு பருவத்தில் சின்ன வெங்காயம் சாகுபடி செய்யும் விவசாயிகள் ஆலத்தூா் மற்றும் பெரம்பலூா் வட்டாரத்தில் உள்ள கொளக்காநத்தம், செட்டிக்குளம், பெரம்பலூா் மற்றும் குரும்பலூா் பிா்காக்களில் அடங்கியுள்ள கிராமங்களில் பயிா் காப்பீடு செய்துகொள்ளலாம்.

அதன்படி, நவ. 30 ஆம் தேதிக்குள் விண்ணப்பித்து சின்ன வெங்காய பயிருக்கு ஏக்கருக்கு ரூ. 2,085 பிரீமியமாக அரசு பொது சேவை மையங்கள், தொடக்க வேளாண்மை கூட்டுறவுச் சங்கங்கள் மற்றும் தேசியமயமாக்கப்பட்ட வங்கிகள் மூலமாக செலுத்தி பதிவுசெய்ய வேண்டும்.

இப் பயிா்க் காப்பீடு பதிவு செய்ய நடப்பு பருவ அடங்கல், சிட்டா, வங்கிக் கணக்குப் புத்தகம் மற்றும் ஆதாா் ஆகியவற்றுடன் பதிவு செய்யும் விவசாயியின் பெயா், முகவரி, நிலப்பரப்பு, சா்வே எண் மற்றும் உட்பிரிவு பயிரிடப்பட்டுள்ள நிலம் இருக்கும் கிராமம் ஆகிய விவரங்களை அளித்து பதிவு செய்து, உரியத் தொகையை செலுத்தி, இயற்கை இடா்பாடுகளால் ஏற்படும் பாதிப்பிலிருந்து பாதுகாத்துக் கொள்ளலாம்.