100 சதவீத வாக்குப் பதிவுக்கு கூடுதல் விழிப்புணா்வு ஏற்படுத்த வேண்டும்: தமிழக தலைமை தோ்தல் அலுவலா்

100 சதவீத வாக்குப் பதிவை எட்டிட கூடுதலாக விழிப்புணா்வு ஏற்படுத்த வேண்டும் என தமிழக தலைமை தோ்தல் அலுவலா் அா்ச்சனா பட்நாயக் தெரிவித்துள்ளாா்.

பெரம்பலூா் மாவட்ட ஆட்சியா் அலுவலக வளாகத்தில் உள்ள மின்னணு வாக்குப்பதிவு இயந்திரங்களின் பாதுகாப்பு அறையை, மாவட்டத் தோ்தல் அலுவலரும், மாவட்ட ஆட்சியருமான கிரேஸ் பச்சாவ், அங்கீகரிக்கப்பட்ட அரசியல் கட்சிகளின் பிரதிநிதிகள் முன்னிலையில், தமிழ்நாடு தலைமை தோ்தல் அலுவலரும், அரசுச் செயலருமான அா்ச்சனா பட்நாயக் வியாழக்கிழமை பாா்வையிட்டு ஆய்வு மேற்கொண்டாா்.

இந்த ஆய்வில், வாக்குப்பதிவு இயந்திரங்களின் பாதுகாப்பு அறையில் 224 மின்னணு வாக்குப்பதிவு இயந்திரங்கள், 721 கட்டுப்பாட்டு கருவிகள், 46 வாக்குப்பதிவை உறுதிப்படுத்தும் இயந்திரங்களை பாா்வையிட்டு ஆய்வு மேற்கொண்ட தலைமை தோ்தல் அலுவா், மின் விளக்குகள், கண்காணிப்பு கேமராக்கள், கண்காணிப்புப் பணியில் ஈடுபட்டு வரும் காவலா்கள் குறித்த நேரத்தில் பாதுகாப்பு பணியில் ஈடுபட்டு வருகின்றனரா என்பது குறித்து சம்பந்தப்பட்ட அலுவலா்களிடம் கேட்டறிந்தாா்.

தொடா்ந்து, மாவட்ட ஆட்சியா் அலுவலகத்தில் நடைபெற்ற வாக்காளா் பதிவு அலுவலா் மற்றும் உதவி வாக்களா் பதிவு அலுவலா்களுடனான ஆய்வு கூட்டத்தில் பங்கேற்ற அவா் செய்தியாளா்களிடம் மேலும் கூறியது:

தமிழ்நாட்டில் வாக்காளா் பட்டியல் சரிபாா்க்கும் பணி நடைபெற்று வருகிறது. கடந்த முறை வாக்காளா் பெயா் சோ்ப்பு முகாமில் தமிழகத்தில் பெரும்பாலான மாவட்டங்களில் இளம் வாக்களா்கள் அதிகளவில் சோ்ந்துள்ளனா். குறிப்பாக, மாநில அளவில் பெரம்பலூா் மாவட்டத்தில் அதிகபட்சமாக சுமாா் 8 ஆயிரம் புதிய இளம் வாக்காளா்கள் சோ்க்கப்பட்டுள்ளனா். 100 சதவீத வாக்குப் பதிவுக்கான இலக்கை எட்டிட கூடுதல் விழிப்புணா்வு ஏற்படுத்த வேண்டும். வாக்காளா் பட்டியல் சரிபாா்ப்பு பணிகள் நிறைவடைந்த பிறகு, புதிய வாக்காளா்கள் மற்றும் இளம் வாக்காளா்கள் குறித்த விவரம் தெரியவரும்.

ஈரோடு தொகுதி சட்டப்பேரவை உறுப்பினா் ஈ.வி.கே.எஸ். இளங்கோவன் உயிரிழந்துவிட்ட நிலையில், அந்தத் தொகுதி காலியாக உள்ளதாக மத்திய தலைமை தோ்தல் அலுவலகத்துக்கு தகவல் அனுப்பப்பட்டுள்ளது. ஈரோடு தொகுதியில் இடைத்தோ்தல் நடத்துவது தொடா்பாக, இந்திய தோ்தல் ஆணையம் தான் அறிவிப்பு வெளியிடும் என்றாா் அவா்.

ஆய்வின்போது, மாவட்ட வருவாய் அலுவலா் மு. வடிவேல் பிரபு, சாா் ஆட்சியா் சு. கோகுல், மாவட்ட ஆட்சியரின் நோ்முக உதவியாளா் (பொது) வைத்தியநாதன் உள்ளிட்டோா் உடனிருந்தனா்.