அயன்பேரையூரில் பனை விதைகள் நடவுப் பணி தொடக்கம்

பெரம்பலூா் மாவட்டம், வேப்பந்தட்டை வட்டம், அயன்பேரையூா் ஊராட்சியில் தோட்டக்கலைத்துறை சாா்பில், பனை மேம்பாட்டு இயக்கத்தின் கீழ் நீா் நிலைகளின் கரை ஓரங்களில் பனை விதைகள் நடும் பணி புதன்கிழமை தொடங்கியது.

அயன்பேரையூா் ஊராட்சியில் 500 பனை விதைகள் நடும் பணிகளை தொடக்கி வைத்த மாவட்ட ஆட்சியா் கிரேஸ் பச்சாவ் கூறியது:

தோட்டக்கலைத்துறை மூலம் செயல்படுத்தப்பட்டுவரும் பனை மேம்பாட்டு இயக்கத்தின் கீழ், இம் மாவட்டத்தில் நடப்பு நிதியாண்டுக்கு 25 ஆயிரம் பனை விதைகள் நடவு செய்யத் திட்டமிடப்பட்டுள்ளது. இதில், ஆலத்தூா், பெரம்பலூா், வேப்பந்தட்டை மற்றும் வேப்பூா் வட்டாரத்துக்கு தலா 6,250 விதைகள் வழங்கப்பட்டுள்ளது.

2024-25 ஆம் ஆண்டு கலைஞரின் அனைத்து கிராம ஒருங்கிணைந்த வேளாண் வளா்ச்சித் திட்டத்தில் தோ்வு செய்யப்பட்ட 25 கிராம ஊராட்சிகளுக்கு முன்னுரிமை அளித்து செயல்படுத்த அறிவுறுத்தப்பட்டுள்ளது.

முதல்கட்டமாக மகாத்மா காந்தி தேசிய ஊரக வேலை உறுதித் திட்டத்தின் கீழ், வேப்பந்தட்டை வட்டாரத்தில் உள்ள அயன்பேரையூா் ஊராட்சியில் உள்ள நீா்நிலைகளின் கரை ஓரங்களில் 500 பனை விதைகள் நடவு செய்யும் பணி தொடங்கப்பட்டுள்ளது. இம் மாவட்டத்தில் ஊரகப் பகுதிகளில் புனரமைக்கப்படும் ஏரி, குளங்கள் மற்றும் புதிதாக உருவாக்கப்படும் குளங்களின் கரைகளில் பனை விதைகள் நடத் திட்டமிடப்பட்டுள்ளது என்றாா் அவா்.

தொடா்ந்து, அயன்பேரையூா் ஊராட்சியில் மகாத்மா காந்தி தேசிய ஊரக வேலை உறுதித் திட்டத்தின் கீழ் ரூ. 10 லட்சம் மதிப்பீட்டில் நடைபெறும் அகழி அமைக்கும் பணியை பாா்வையிட்டு ஆய்வு மேற்கொண்ட ஆட்சியா், பணியாளா்களின் வருகைப் பதிவேடு, நிா்வாக அனுமதி பெற்றுள்ள பணியின் திட்ட மதிப்பீடு, பணி தொடங்கப்பட்ட நாள், பணியாளா்களுக்கு வழங்கப்படும் ஊதியம் ஆகியவற்றை ஆய்வு மேற்கொண்டாா்.

இந் நிகழ்ச்சியில், தோட்டக்கலைத்துறை துணை இயக்குநா் மு. சத்யா, வேப்பந்தட்டை வட்டாரத் தோட்டக்கலை உதவி இயக்குநா் செ. விஜயகாண்டீபன், தோட்டக்கலை உதவி இயக்குநா் (நடவுபொருள்) சு. செல்வபிரியா, வட்டார வளா்ச்சி அலுவலா் செல்வமணி ஆகியோா் பங்கேற்றனா்.