கொட்டரை நீா்த்தேக்கம் அருகே பாலம் அமைக்க நடவடிக்கை

விவசாயிகள் தங்களது வயலுக்குச் செல்லும் வகையில் பாலம் அமைக்க நடவடிக்கை மேற்கொள்ளப்படும் என மாவட்ட ஆட்சியா் ந. மிருணாளினி தெரிவித்துள்ளாா்.

பெரம்பலூா் மாவட்டம், ஆலத்தூா் வட்டத்துக்குள்பட்ட கொட்டரை ஊராட்சியில் கட்டப்பட்டுள்ள கொட்டரை நீா்த்தேக்கம் அருகேயுள்ள விவசாய நிலங்களுக்குச் செல்லும் வகையில் பாலம் அமைக்க வேண்டும் என, விவசாயிகள், பொதுமக்கள் விடுத்த கோரிக்கையின் அடிப்படையில், அப்பகுதியை புதன்கிழமை பாா்வையிட்டு ஆய்வு மேற்கொண்ட மாவட்ட ஆட்சியா் மேலும் கூறியது: கொட்டரை ஊராட்சியில் மருதையாற்றின் குறுக்கே ரூ. 92.70 கோடி மதிப்பில் சுமாா் 815 ஏக்கா் பரப்பளவில் 212.475 மில்லியன் கன அடி நீா் தேக்கும் வகையில் கொட்டரை நீா்த்தேக்கமானது கட்டப்பட்டுள்ளது.

2,360 மீட்டா் நீளம் உள்ள இந்த அணையில் 2 பாசன மதகுகள் அமைக்கப்பட்டுள்ளது. 9.91 கி.மீ நீளமுள்ள இடதுபுற கால்வாய் மூலம் 3,188 ஏக்கா் புன்செய் நிலங்களுக்கும், 6.73 கி.மீ. நீளமுள்ள வலதுபுற கால்வாய் மூலம் 1,006 ஏக்கா் புன்செய் நிலங்களுக்கும் பாசன வசதி பெறுவதால், 4,830.38 டன் உணவு உற்பத்தி ஏற்படும் வகையில் இந்த அணை அமைக்கப்பட்டுள்ளது.

இந்த நீா்த்தேக்கத்தின் மூலம் இடது புற கால்வாய் வழியாக கொட்டரை, ஆதனூா், கூத்தூா், புஜங்கராயநல்லூா், நொச்சிக்குளம், தொண்டப்பாடி, அழகிரிபாளையம், அரியலூா் ஆகிய கிராமங்களும், வலதுபுற கால்வாய் மூலம் கொட்டரை, ஆதனுா், கூடலூா், சாத்தனூா் ஆகிய கிராமங்களும் பயனடையும். இந் நீா்த் தேக்கமானது, கொட்டரை, ஆதனூா், சாத்தனூா், கூடலூா், புஜங்கராயநல்லூா், கூத்தூா், அழகிரிபாளையம், தொண்டப்பாடி, பிலிமிசை ஆகிய 9 கிராமங்கள் பயனடையும் வகையிலும், சுமாா் 4,194 ஏக்கா் பரப்பளவில் விவசாயிகள் பாசனம் பெறும் வகையிலும் கட்டப்பட்டுள்ளது.

மழைக்காலங்களில் இந்த அணையில் தண்ணீா் நிரம்பும்போது, அருகிலுள்ள விவசாய நிலங்களுக்குச் செல்ல முடியாத சூழல் இருப்பதாலும், கால்நடைகள் செல்வதற்கு சிரமமாக உள்ளதாகவும், பாலம் கட்டித் தருமாறும் பொதுமக்கள் மற்றும் விவசாயிகள் கோரிக்கை விடுத்துள்ளனா். அதன்படி, அரசு விதிகளுக்குள்பட்டு நிதி ஒதுக்கீடு பெற்று விரைவில் பாலம் கட்டித்தர உரிய நடவடிக்கை எடுக்கப்படும் என்றாா் ஆட்சியா் மிருணாளினி.

இந்த ஆய்வின்போது, மாவட்ட ஊரக வளா்ச்சி முகமை திட்ட இயக்குநா் சு. தேவநாதன், ஆலத்தூா் வட்டார வளா்ச்சி அலுவலா்கள் சேகா், வாசுகி, வட்டாட்சியா் முத்துக்குமரன், நீா்வளத்துறை உதவி பெறியாளா் தினகரன் ஆகியோா் உடனிருந்தனா்.