பெரம்பலூா் மாவட்டத்தில் ஜன. 22 முதல் விளையாட்டுப் போட்டிகள்

பெரம்பலூா் மாவட்டத்தில் ஜன. 22 முதல் ஒன்றிய, மாவட்ட அளவிலான விளையாட்டுப் போட்டிகள் நடைபெற உள்ளதாக மாவட்ட ஆட்சியா் ந. மிருணாளினி தெரிவித்தாா்.

பெரம்பலூா் மாவட்ட ஆட்சியரக கூட்டரங்கில், இது நம்ம ஆட்டம்- 2026 எனும் தலைப்பில் மாவட்ட, ஒன்றிய அளவிலான முதலமைச்சா் இளைஞா் விளையாட்டுத் திருவிழா போட்டிகள் நடத்துவது தொடா்பான கலந்தாய்வுக் கூட்டம் சனிக்கிழமை நடைபெற்றது.

இக் கூட்டத்துக்கு தலைமை வகித்து மாவட்ட ஆட்சியா் மேலும் பேசியதாவது: 16 வயது 35 வயது வரையிலான தகுதியுடைய இளைஞா்கள் பங்கேற்கும் வகையில், ஒன்றிய அளவிலான போட்டிகள் நடைபெற உள்ளது. ஒவ்வொரு ஊராட்சி ஒன்றியத்திலும் முதலிடம் பெறும் வீரா், வீராங்கனைகள் மற்றும் அணிகள் மாவட்ட அளவிலான போட்டிகளில் பங்கேற்க தகுதிபெறும்.

ஒன்றிய, மாவட்ட அளவில் 100 மீட்டா், குண்டு எறிதல், கபடி, வாலிபால், கேரம், கயிறு இழுத்தல், ஸ்ட்ரீட் கிரிக்கெட் ஆகிய போட்டிகளும், மாவட்ட அளவில் ஓவியம், கோலப் போட்டிகள், உடல்சாா் மாற்றுத்திறனாளிகளுக்கு 100 மீட்டா் ஓட்டம், பாா்வை சாா் மாற்றுத்திறனாளிகளுக்கு குண்டு எறிதல் போட்டி, அறிவுசாா், செவிசாா் மாற்றுத்திறனாளிகளுக்கு 100 மீட்டா் ஓட்டப் போட்டிகளும், மாவட்ட அளவில் முதலிடம் பெறும் பெண்கள் கபடி அணி, ஆண்களுக்கான ஸ்ட்ரீட் கிரிக்கெட் அணியினருக்கு மாநில அளவிலான போட்டிகள் நடத்தப்படும்.

ஒன்றிய அளவிலான போட்டிகள் ஊராட்சி ஒன்றியங்களில் ஜன. 22 முதல் 25 வரையிலும், மாவட்ட அளவிலான போட்டிகள் ஜன. 30 முதல் பிப். 1 வரை மாவட்ட விளையாட்டு அரங்கில் நடைபெறுகிறது. மாநில அளவிலான போட்டிகள் சென்னையில் நடைபெறும். ஒன்றிய அளவில் தனி நபா் மற்றும் குழுப் போட்டிகளில் முதலிடம் பெறுபவருக்கு தலா ரூ. 3 ஆயிரமும், 2- ஆம் இடம் பெறுபவருக்கு தலா ரூ. 2 ஆயிரமும், 3-ஆம் இடம் பெறுபவருக்கு தலா ரூ. 1,000, மாவட்ட அளவில் தனிநபா் மற்றும் குழு போட்டிகளில் முதலிடம் பெறுபவருக்கு தலா ரூ. 6 ஆயிரமும், 2-ஆம் இடம் பெறுபவருக்கு தலா ரூ. 4 ஆயிரமும், 3- ஆம் இடம் பெறுபவருக்கு தலா ரூ. 2 ஆயிரமும், மாநில அளவில் குழுப் போட்டியில் முதலிடம் பெறுபவருக்கு தலா ரூ. 75 ஆயிரமும், 2-ஆம் இடம் பெறுபவருக்கு தலா ரூ. 50 ஆயிரமும், 3- ஆம் இடம் பெறுபவருக்கு தலா ரூ. 25 ஆயிரமும் வழங்கப்படும்.

இப் போட்டிகளில் பங்கேற்க ஜன. 21-ஆம் தேதி மாலை 5 மணிக்குள் இணையதளம் வாயிலாக முன்பதிவு செய்ய வேண்டும். கூடுதல் விவரங்களுக்கு, மாவட்ட விளையாட்டு மற்றும் இளைஞா் நலன் அலுவலரை நேரில் அல்லது 74017-03516 எனும் கைப்பேசி எண்ணில் தொடா்புகொள்ளலாம் என்றாா் அவா்.

இக் கூட்டத்தில், மாவட்ட வருவாய் அலுவலா் க. கண்ணன், மாவட்ட முதன்மைக் கல்வி அலுவலா் சுவாமி முத்தழகன், ஊராட்சிகள் உதவி இயக்குநா் ரமேஷ், மாவட்ட மாற்றுத்திறனாளிகள் நல அலுவலா் சீனிவாசன் உள்ளிட்ட பலா் கலந்துகொண்டனா்.