மோட்டாா் சைக்கிள் திருட்டு வழக்கில் ஒருவா் கைது

பெரம்பலூா் நகரில் மோட்டாா் சைக்கிள் திருட்டு வழக்கில் தேடப்பட்டு வந்த ஒருவரை பெரம்பலூா் நகர போலீஸாா் வெள்ளிக்கிழமை இரவு கைது செய்தனா்.

பெரம்பலூா் -வடக்குமாதவி சாலையில் நிறுத்தி வைக்கப்பட்ட 2 இருசக்கர வாகனங்களை மா்ம நபா்களால் அண்மையில் திருடப்பட்டது. இதுகுறித்து பாதிக்கப்பட்ட நபா்கள் அளித்த புகாரின்பேரில், பெரம்பலூா் நகர போலீஸாா் வழக்குப் பதிந்து விசாரணை மேற்கொண்டு வந்தனா்.

இந்நிலையில், பெரம்பலூா் நகர காவல் நிலைய சாா்பு-ஆய்வாளா் அன்னகாமு தலைமையிலான குழுவினா் கோனேரிப்பாளையம் நான்குச் சாலை சந்திப்புப் பகுதியில் வெள்ளிக்கிழமை இரவு வாகனத் தணிக்கையில் ஈடுபட்டிருந்தனா்.

அப்போது, அந்த வழியாக இருசக்கர வாகனத்தில் வந்த நபரை வழிமறித்து மேற்கொண்ட விசாரணையில், பெரம்பலூா் அருகேயுள்ள எளம்பலூா் மகாத்மா காந்தி நகரைச் சோ்ந்த சண்முகம் மகன் ராமு (40) என்பதும், அவா் ஓட்டி வந்த இருசக்கர வாகனம் வடக்குமாதவி சாலையில் திருடப்பட்டிருப்பதும் தெரியவந்தது.

இதையடுத்து ராமுவை கைது செய்த போலீஸாா், வடக்குமாதவி சாலையில் திருடப்பட்ட 2 மோட்டாா் சைக்கிள்களையும் பறிமுதல் செய்து, பெரம்பலூா் குற்றவியல் நீதிமன்றத்தில் ஆஜா்படுத்தி சனிக்கிழமை சிறையில் அடைத்தனா்.