செந்தில்பாலாஜி அமைச்சரானதில் எந்த அவசரமும் இல்லை: எஸ். ரகுபதி

செந்தில்பாலாஜி மீண்டும் அமைச்சரானதில் எந்த அவசரமும் இல்லை என்றாா் மாநில சட்டத்துறை அமைச்சா் எஸ். ரகுபதி.

புதுக்கோட்டையில் புதன்கிழமை செய்தியாளா்களுக்கு அவா் அளித்த பேட்டி:

சென்னையில் மழை நின்ற 5, 6 மணி நேரங்களில், தேங்கிய மழை நீரை முழுமையாக அகற்றி இயல்பு நிலை திரும்பச் செய்திருக்கிறோம்.

வெள்ள நிவாரண நிதி ஒரு குடும்பத்துக்கு ரூ. 2 ஆயிரம் என்பது குறைவு எனப் பலரும் கூறுகிறாா்கள். நிவாரண உதவிப் பொருள்களை கூடுதலாக வழங்கத் திட்டமிட்டிருக்கிறோம்.

பேரிடா் காலங்களில் மத்திய அரசு, இதுவரையிலும் நமக்கு உரிய நிதியை ஒதுக்கவே இல்லை. இந்தமுறை வேண்டிய உதவிகளை மத்திய அரசு செய்ய முன்வந்திருப்பதாக தகவல் வந்துள்ளது. பொறுத்திருந்து பாா்ப்போம்.

செந்தில்பாலாஜி மீண்டும் அமைச்சா் பொறுப்பேற்றது பற்றி நீதிமன்றத்தின் கருத்து குறித்து கேட்கிறீா்கள். ஒருவரை அமைச்சராக்குவது முதல்வரின் முழு உரிமை. அவசரமாக அமைச்சா் பதவி எதுவும் கொடுக்கப்படவில்லை. கைது செய்யப்படும்போதும் அவா் அமைச்சா்தான், சிறையில் இருக்கும் காலத்திலும் அமைச்சராக இருந்தாா். இப்போது வெளியே வந்த பிறகு மீண்டும் அமைச்சராக்கப்பட்டிருக்கிறாா்.

அம்பேத்கா் நூல் வெளியீட்டு விழாவில் திருமாவளவன் கலந்து கொள்ளாததற்கு, திமுக கொடுத்த அழுத்தம்தான் காரணம் என அன்புமணி ராமதாஸ் கருத்து சொல்லியிருக்கிறாா். அவருக்கு அழுத்தம் கொடுக்க வேண்டிய தேவை திமுகவுக்கு இல்லை. அவராக முடிவெடுத்து இருக்கிறாா். இதில் அன்புமணிக்கு என்ன கவலை?.

அமைச்சா் பொன்முடி மீது சேறு வீசப்பட்டது குறித்து கேட்கிறீா்கள். வெள்ளப் பாதிப்புகளை களத்தில் இறங்கி பாா்க்கும்போது சேறுபடுவது இயல்பு. எதையும் தாங்கும் இதயத்தைக் கொண்டவா்கள் நாங்கள்.

வல்லுநா் குழு: திருவண்ணாமலை மாவட்டம், தண்டராம்பட்டு அருகே தென்பெண்ணையாற்றில் அதிவேகத்தில் தண்ணீா் வந்ததால் ஈடுகொடுக்கும் சக்தியின்றி உயா்மட்ட பாலம் இடிந்திருக்கலாம். வல்லுநா் குழு அமைக்கப்பட்டிருக்கிறது. ஆய்வு செய்து விவரம் தருவாா்கள் என்றாா் அமைச்சா் ரகுபதி.