புதுக்கோட்டை மாவட்டம், தச்சன்குறிச்சியில் மாநிலத்தின் முதல் ஜல்லிக்கட்டுப் போட்டி நடைபெறும் திடலை மாவட்ட ஆட்சியா் மு. அருணா புதன்கிழமை ஆய்வு செய்தாா்.
தச்சன்குறிச்சி கிராமத்தில் உள்ள புனித விண்ணேற்பு அன்னை ஆலயத்தில் புத்தாண்டு பிறப்பையொட்டி ஆண்டுதோறும் மாநிலத்தின் முதல் ஜல்லிக்கட்டுப் போட்டி நடைபெறுவது வழக்கம். நிகழாண்டில் ஜனவரி 3-ஆம் தேதி ஜல்லிக்கட்டுப் போட்டி நடத்த அனுமதி அளிக்கப்பட்டுள்ளது.
இதைத் தொடா்ந்து, தச்சன்குறிச்சியில் உள்ள ஜல்லிக்கட்டு திடலை மாவட்ட ஆட்சியா் மு. அருணா புதன்கிழமை நேரில் பாா்வையிட்டு, வாடிவாசல், விழா மேடை, காளைகள் ஓடுதளம், பாா்வையாளா்கள் மாடம் ஆகியவற்றை விதிமுறைகளின்படி அமைக்க வேண்டுமென தெரிவித்தாா். ஆய்வின்போது, கந்தா்வகோட்டை வட்டாட்சியா் ம. ரமேஷ் உடனிருந்தாா்.
