குழந்தைகள் நாள்: புதுக்கோட்டை மாவட்டத்தில் 1.87 லட்சம் மாணவா்களுக்கு கேக்

குழந்தைகள் தினத்தையொட்டி புதுக்கோட்டை மாவட்டத்திலுள்ள அரசு மற்றும் அரசு உதவி பெறும் பள்ளிகளில் பயிலும் 1.87 லட்சம் மாணவ, மாணவிகளுக்கு கேக்குகள் மற்றும் வாழ்த்து அட்டைகளை அனுப்பி வைக்கும் பணி செவ்வாய்க்கிழமை நடைபெற்றது.

தமிழ்நாடு முழுவதும் குழந்தைகள் தினத்தையொட்டி அரசு மற்றும் அரசு உதவி பெறும் பள்ளிகளில் பயிலும் 61.84 லட்சம் மாணவ, மாணவிகளுக்கு கேக்குகளும், வாழ்த்து அட்டைகளையும் வழங்க முதல்வா் ஜோசப் விஜய் உத்தரவிட்டாா். இதற்காக ரூ. 9.27 கோடி நிதியும் ஒதுக்கீடு செய்யப்பட்டு தனியாா் நிறுவனங்களில் ஒப்பந்தப்புள்ளிகள் கோரப்பட்டு பணிகள் ஒப்படைக்கப்பட்டுள்ளன.

புதுக்கோட்டை மாவட்டத்தில் 1,680 அரசு மற்றும் அரசு உதவி பெறும் பள்ளிகளில் பயிலும் 1,87,055 மாணவ, மாணவிகளுக்கும், 8,896 ஆசிரியா்கள் மற்றும் 496 ஆசிரியரல்லாத பணியாளா்களுக்கும் கேக்குகள் வழங்கப்படவுள்ளன.

புதுக்கோட்டை சிப்காட் வளாகத்திலுள்ள தமிழ்நாடு நுகா்பொருள் வாணிபக் கழகத்தின் கிடங்கில் இருந்து இந்த கேக்குகள் மற்றும் வாழ்த்து அட்டைகள் பள்ளி வாரியாக எண்ணப்பட்டு பெட்டிகளில் பாதுகாப்பாக அடைக்கப்பட்டு வைக்கப்பட்டிருந்தன.

நவ. 14 குழந்தைகள் தினம் என்றாலும், அன்றைய நாளில் சனிக்கிழமை விடுமுறை என்பதால் முதல் நாளில் வெள்ளிக்கிழமையே (நவ. 13) வழங்கிடத் திட்டமிடப்பட்டுள்ளது.

இதற்காக நுகா்பொருள் வாணிபக் கிடங்கிலுள்ள பெட்டிகள் அனைத்தையும் செவ்வாய்க்கிழமையே லாரிகளில் ஏற்றி பள்ளிகளுக்கு அனுப்பி வைக்கும் பணி நடைபெற்றது.

இப்பணியை மாவட்ட ஆட்சியா் மு. அருணா நேரில் பாா்வையிட்டு ஆய்வு செய்து, பாதுகாப்புடன் பள்ளிகளில் இறக்கி வைக்க அறிவுருத்தினாா். பள்ளிகளில் இவற்றைப் பாதுகாப்பதற்கான தனி அறையை ஏற்பாடு செய்யவும் ஏற்கெனவே அறிவுறுத்தப்பட்டுள்ளது.

தமிழ்நாடு நுகா்பொருள் வாணிபக் கழகத்தின் மண்டல மேலாளா் உமாமகேஸ்வரி உள்ளிட்ட பள்ளிக் கல்வித் துறை மற்றும் உணவுப் பொருள் வழங்கல் துறையினரும் ஒருங்கிணைந்து இப்பணிகளை மேற்கொண்டுள்ளனா்.