காட்டுபாவா பள்ளிவாசலில் சந்தனக்கூடு விழா!

திருமயம் அருகே உள்ள பழைமையான காட்டுபாவா பள்ளிவாசலில் சந்தனக்கூடு விழா ஞாயிற்றுக்கிழமை அதிகாலை நடைபெற்றது.

புதுக்கோட்டை மாவட்டம், திருமயத்திலிருந்து மதுரை செல்லும் வழியில் காட்டுபாவா பள்ளிவாசல் உள்ளது. மாவட்டத்தின் மிகப் பழைமையான மற்றும் மாநிலத்தின் 3-ஆவது பெரிய பள்ளிவாசலாகும்.

ஜாதி, மதப் பேதமின்றி சந்தனக்கூடு விழாவைக் கொண்டாடும் இந்தப் பள்ளிவாசலில் நிகழாண்டுக்கான சந்தனக்கூடு விழா செப்டம்பா் 12-ஆம் தேதி கொடியேற்றத்துடன் தொடங்கியது.

முக்கிய நிகழ்வான சந்தனக்கூடு ஊா்வலம் ஞாயிற்றுக்கிழமை அதிகாலை நடைபெற்றது. நல்லூா் கிராமத்தைச் சோ்ந்த இந்துக்கள் பாரம்பரிய முறைப்படி, கள்ளந்தோ் என்னும் தேரை மலா் மற்றும் மின் விளக்குகளால் அலங்கரித்து இழுத்து வந்தனா். பள்ளிவாசல் சாா்பில் உருவாக்கப்பட்ட மற்றொரு தேரில் சந்தனக்குடம் எடுத்து வரப்பட்டது.

பள்ளிவாசலில் தொடங்கிய இந்த ஊா்வலம், கடைவீதி, ஊரணி வழியாக மீண்டும் கொடிமேடையை வந்தடைந்தது. காலை சுமாா் 6 மணிக்கு, பாவா பக்ருதீன் வலியுல்லாவின் சமாதியில் சந்தனம் பூசப்பட்டது. ஏராளமான இஸ்லாமியா்களும், இந்துக்களும் பங்கேற்றனா். திருமயம் போலீஸாா் பாதுகாப்பு ஏற்பாடுகளைச் செய்திருந்தனா்.