கதுவா பலாத்கார சம்பவத்தை கண்டித்து குடந்தையில் மனிதச்சங்கிலி போராட்டம்

காஷ்மீரின் கதுவா பகுதியில் 8 வயது சிறுமியை கடத்தி பலாத்காரம் செய்து,  கொல்லப்பட்டதை கண்டித்து எஸ்டிபிஐ அமைப்பின் பெண்கள் பிரிவான விமன்ஸ் ப்ரண்ட் அமைப்பு சார்பில் கும்பகோணத்தில் செவ்வாய்க்கிழமை மனிதச்சங்கிலி போராட்டம் நடைபெற்றது.
கும்பகோணம் தலைமை அஞ்சலகம் முன்பு நடைபெற்ற இந்தப் போராட்டத்துக்கு நேஷனல் விமன்ஸ் ப்ரண்ட் தஞ்சாவூர் மாவட்டத் தலைவி சாஜிதாபானு தலைமை வகித்தார். இதில்,  நம் நாட்டில் பெண்களுக்கு முழு பாதுகாப்பு அளித்திட வேண்டும். நாட்டில் நிகழும் பாலியல் வன்முறைகளை தடுக்க உறுதியான சட்டங்களை இயற்ற வேண்டும். 
காஷ்மீர் மாநிலத்தில் 8 வயது சிறுமியின் படுகொலை சம்பவத்தில் சம்பந்தப்பட்ட குற்றவாளிகளுக்கு கடும் தண்டனை வழங்க வேண்டும் என்பது உள்ளிட்ட கோரிக்கைகளை வலியுறுத்தி முழக்கங்களை எழுப்பினர். விடுதலைச்சிறுத்தைகள் கட்சியின் இளைஞர் அணியின் மாநில செயலாளர் குடந்தை தமிழினி கண்டன உரையாற்றினார்.  மாவட்டச் செயலாளர் ஆயிஷாபேகம், மாவட்ட செயற்குழு உறுப்பினர் ஷர்மிளாபானு ஆகியோர் முன்னிலை வகித்தனர்.