அரசு இசைக் கல்லூரியில் சேர மாணவர்கள் விண்ணப்பிக்கலாம்

தஞ்சாவூர் மாவட்டம், திருவையாறு அரசு இசைக் கல்லூரியில் பட்டப்படிப்பு மற்றும் பட்டயப்படிப்புகளில் சேர மாணவ, மாணவிகள் விண்ணப்பிக்கலாம் என மாவட்ட ஆட்சியர் ஆ. அண்ணாதுரை தெரிவித்துள்ளார்.
இதுகுறித்து அவர் மேலும் தெரிவித்திருப்பது: தஞ்சாவூர் மாவட்டம், திருவையாறு அரசு இசைக் கல்லூரியில் இளங்கலை இசைப் பிரிவில் 3 ஆண்டு காலப் பட்டபடிப்புக்கு அனுமதி நடைபெறுகிறது. இளங்கலை இசைப்பிரிவு பட்டப்படிப்பில் சேருவதற்குக் கல்வித் தகுதி 12-ம் வகுப்புத் தேர்ச்சி பெற்றிருக்க வேண்டும். 
முதுகலை இசைப் பிரிவு 2 ஆண்டு காலப் பட்டப்படிப்புக்குக் கல்வித் தகுதி இளங்கலை இசை தேர்ச்சி பெற்றிருக்க வேண்டும். மேலும், இசை முனைவர் பட்ட ஆய்வு முழு நேரம் மற்றும் பகுதி நேரமாகச் செயல்படுகிறது.
இசை பட்டயப் படிப்புக்குக் கல்வித் தகுதி 10-ம் வகுப்பு தேர்ச்சி பெற்றிருக்க வேண்டும். மூன்றாண்டு கால நாகசுரம், தவில், மிருதங்கம், பரதநாட்டியம் ஆகிய பட்டயப்படிப்புகளுக்கு 10-ம் வகுப்புத் தேர்ச்சி பெற்றிருக்க வேண்டும். ஓராண்டு கால இசை ஆசிரியர் பயிற்சியில் சேருவதற்கு 10-ம் வகுப்பு தேர்ச்சி பெற்றிருக்க வேண்டும். அனைத்து துறைகளிலும் இருபாலரும் சேர்க்கப்படுவர். இசைக் கல்லூரியில் சேர விரும்புவோர் முதல்வர், தமிழ்நாடு அரசு இசைக் கல்லூரி, திருவையாறு 613204, தஞ்சாவூர் மாவட்டம் என்ற முகவரிக்கு விண்ணப்பிக்கலாம்.