காசோலை மோசடி வழக்கில் மருத்துவருக்கு 2 ஆண்டு சிறை

காசோலை (செக்) மோசடி வழக்கில் மருத்துவருக்கு 2 ஆண்டு சிறை தண்டனை விதித்து பட்டுக்கோட்டை நீதிமன்றம் திங்கள்கிழமை தீர்ப்பளித்தது.
பட்டுக்கோட்டை செட்டித் தெருவில் வசிப்பவர் மருத்துவர் ஆர்.ராஜேந்திரன் (65). இவர் தஞ்சை சாலையில் சொந்தமாக கிளினீக் நடத்தி வருகிறார். 
பட்டுக்கோட்டை அறந்தாங்கி சாலையிலுள்ள தைலம்மை நகரைச் சேர்ந்தவர் அடைக்கலம் செட்டியார் மகன் பாலசுப்பிரமணியன் (54).  இவரிடம், மருத்துவர் ராஜேந்திரன் 1 மாதத்தில் திருப்பித் தருவதாகக் கூறி 6.7.2015-ல் ரூ. 12 லட்சம் கடன் வாங்கியுள்ளார். இதற்காக பாலசுப்பிரமணியன் பெயருக்கு 10.8.2015 தேதியிட்டு ரூ. 12 லட்சத்துக்கான செக்  கொடுத்துள்ளார்.  வங்கியில் செலுத்தியபோது போதிய பணம் இல்லாததால் செக் திரும்பி வந்து விட்டதாம். 
இதையடுத்து, செக் மோசடி செய்து தன்னை ஏமாற்றி விட்டதாக மருத்துவர் ராஜேந்திரன் மீது 6.10.2015-ல் பட்டுக்கோட்டை குற்றவியல் விரைவு நீதிமன்றத்தில் பாலசுப்பிரமணியன் வழக்குத் தொடர்ந்தார். வழக்கு விசாரணையின் நிறைவில்,  டாக்டர் ராஜேந்திரனுக்கு 2 ஆண்டுகள் சிறை தண்டனை விதித்து நீதிபதி திங்கள்கிழமை தீர்ப்பளித்தார். மேலும், தனது தீர்ப்பில் கடன் தொகை ரூ. 12 லட்சத்தை மருத்துவர் ராஜேந்திரன்,  பட்டுக்கோட்டை குற்றவியல் விரைவு நீதிமன்றத்தில் செலுத்த வேண்டுமெனவும் நீதிபதி உத்தரவிட்டார்.