வேளாண்மைத் துறை பணியாளர்கள் செப். 17 முதல் உண்ணாவிரதம்

சென்னையில் தமிழ்நாடு வேளாண்மைத் துறை அமைச்சுப் பணியாளர்கள் கோரிக்கைகளை வலியுறுத்தி செப். 17-ம் தேதி முதல் காலவரையற்ற உண்ணாவிரதப் போராட்டம் மேற்கொள்ள உள்ளனர்.
இதுதொடர்பாக தஞ்சாவூரில் அச்சங்கத்தின் ஆயத்தக் கூட்டம் செவ்வாய்க்கிழமை நடைபெற்றது. தோட்டக்கலைத் துறையில் மாவட்டம் முழுவதற்கும் நிர்வாகப் பணிகள் பார்ப்பதற்கும், அரசால் ஒதுக்கீடு செய்யப்படும் நிதியை முறையாகக் கையாளவும், மாவட்டத்துக்கு ஒரு நிர்வாக அலுவலர் பணியிடம் அனுமதிக்கப்படும் என அரசால் ஏற்றுக் கொள்ளப்பட்டது. ஆனால், இதுவரை இப்பணியிடம் அனுமதிக்கப்படவில்லை. எனவே, அரசால் ஏற்றுக் கொள்ளப்பட்ட நீண்ட காலமாக நிலுவையில் உள்ள கோரிக்கையான மாவட்டத் தோட்டக்கலைத் துறைத் துணை இயக்குநர் அலுவலகங்களுக்கு தலா ஒரு நிர்வாக அலுவலர் பணியிடம் அனுமதிக்க வேண்டும் என்பது உள்ளிட்ட கோரிக்கைகளை வலியுறுத்தி சென்னை சேப்பாக்கத்தில் காலவரையற்ற உண்ணாவிரதப் போராட்டம் செப். 17-ம் தேதி முதல் நடைபெறவுள்ளது என கூட்டத்தில் குறிப்பிடப்பட்டது.
கூட்டத்தில் மாநிலத் தலைவர் இரா. பன்னீர்செல்வம் தலைமையில் பலர் கலந்து கொண்டனர்.