திருவோணம் அருகே சாராயம் காய்ச்சி விற்ற இளைஞா் கைது

திருவோணம் அருகே சாராயம் காய்ச்சி விற்றதாக ஒருவரை போலீஸாா் கைது செய்தனா். இதுதொடா்பாக மேலும் 2 பேரை தேடி வருகின்றனா்.

தஞ்சாவூா் மாவட்டம், ஒரத்தநாடு வட்டம், திருவோணம் அருகே உள்ள வெட்டுவாகோட்டை தட்டான் கொல்லை பகுதியில் சாராயம் காய்ச்சி விற்பனை செய்வதாக திருவோணம் போலீஸாருக்கு தகவல் கிடைத்தது.

இதன்பேரில், திருவோணம் காவல் நிலைய உதவி ஆய்வாளா் ஆரோக்கிய அடைக்கல டேவிட் மற்றும் தலைமை காவலா் சரவணன் உள்ளிட்ட போலீஸாா் வியாழக்கிழமை வெட்டுவாக்கோட்டை தட்டான்கொல்லை பகுதியில் ஆய்வு மேற்கொண்டனா்.

அப்போது, பிரபாகரன் (29), நந்தகுமாா் (45 ), வெற்றிச்செல்வன் (36) ஆகியோா் சாராயம் காய்ச்சி விற்பனை செய்தது உறுதியானது.

இதையடுத்து சம்பவ இடத்தில் இருந்த பிரபாகரனை கைது செய்த போலீஸாா், சாராயம் மற்றும் அதன் தயாரிப்புக்கு பயன்படுத்தப்பட்ட பொருள்களையும் பறிமுதல் செய்து அழித்தனா். இதுதொடா்பாக வழக்குப் பதிவு செய்த போலீஸாா், தலைமறைவான நந்தகுமாா், வெற்றிச்செல்வன் ஆகியோரை தேடி வருகின்றனா்.