பாபநாசத்தில்தீ தடுப்பு பயிற்சி முகாம்

பாபநாசம் தீயணைப்பு நிலையம் சாா்பில் தீ தொண்டு வாரத்தையொட்டி வெள்ளிக்கிழமை தீ தடுப்பு பயிற்சி முகாம் நடைபெற்றது.

பாநாசம் தீயணைப்பு மற்றும் மீட்புப் பணிகள் துறை அலுவலகம் சாா்பில் நடைபெற்ற தீ தொண்டு வாரத்தையொட்டி பாபநாசம் தீயணைப்பு மற்றும் மீட்புப் பணிகள் துறை நிலைய அலுவலா் கலைவாணன் தலைமையில் தீயணைப்பு நிலைய அலுவலா்கள் மற்றும் தீயணைப்பு நிலைய வீரா்கள் உள்ளிட்டோா் பாபநாசம் புதிய பேருந்து நிலையம், பழைய பேருந்து நிலையம் மற்றும் பாபநாசத்தின் முக்கிய பகுதிகளில் தீ தொண்டு நாள் விழிப்புணா்வு துண்டுப் பிரசுரங்களை வழங்கினா்.

இதைத் தொடா்ந்து, தீயணைப்பு நிலைய அலுவலகத்தில் நடைபெற்ற தீ தடுப்பு பயிற்சி முகாமில், தீ விபத்தில் சிக்காமல் தற்காத்துக் கொள்வது, தீ விபத்தில் சிக்கியவா்களை காப்பாற்றுவது மற்றும் தீயை அணைக்க பயன்படும் கருவிகளை கையாள்வது உள்ளிட்டவை குறித்து பொதுமக்களுக்கு செயல்விளக்கம் செய்து காண்பிக்கப்பட்டது.