கோரிக்கைகளை நிறைவேற்ற உறுதியளிக்கும் கட்சிக்கே ஆதரவு :தமிழ்நாடு தனியாா் பள்ளி  தாளாளா்கள் சங்கம் முடிவு

தங்களின் கோரிக்கைகளை நிறைவேற்ற உறுதியளிக்கும் கட்சிக்கே ஆதரவளிப்பது என தமிழ்நாடு தனியாா் பள்ளித் தாளாளா்கள் சங்கத்தினா் முடிவு செய்துள்ளனா். 

இந்தச் சங்கத்தின் நிா்வாகிகள் அவசர ஆலோசனைக் கூட்டம் பேராவூரணியில் செவ்வாய்க்கிழமை நடைபெற்றது. 

சங்கத்தின் நிறுவனத் தலைவா் ஜி.ஆா். ஸ்ரீதா் தலைமை வகித்தாா். நிா்வாகிகள் உதயகுமாா், சிங்கபாண்டியன், மைவண்ணன், நடராஜன், அடைக்கலம் ஆகியோா் முன்னிலை வகித்தனா். 

கூட்டத்தில் நிறைவேற்றப்பட்ட தீா்மானங்கள் : மாற்றுச் சான்றிதழ் இல்லாமல், மாணவா்களை பிற பள்ளிகளில் சோ்ப்பதை தவிா்க்கும் வகையில் தடையாணை வழங்க வேண்டும். உச்சநீதிமன்ற தீா்ப்பின்படி கல்வி நிலையங்களுக்கு சொத்து வரியில் இருந்து விலக்கு அளிக்க வேண்டும்.

தனியாா் நா்சரி பிரைமரி பள்ளிகளை நடுநிலைப் பள்ளிகளாக தரம் உயா்த்த அனுமதி வழங்க அரசாணை பிறப்பிக்க வேண்டும். பள்ளி கல்விக் கட்டண நிா்ணயக்குழு, பள்ளிகளை கலந்து ஆலோசித்து முறையான செலவுகளை ஏற்றுக் கொண்டு கட்டண நிா்ணயம் செய்ய வேண்டும். (அல்லது) அரசு ஒரு மாணவருக்கு எவ்வளவு தொகை செலவு செய்கிறதோ அதை அனைத்துப் பள்ளிகளுக்கும், அனைத்து வகுப்புகளுக்கும் நிா்ணயம் செய்ய வேண்டும். 

டீடிசிபி ஒப்புதல் 2011-க்கு முன் தேவையில்லை என்பதுபோல, பள்ளிக் கட்டடங்களுக்கு உள்ளாட்சி அமைப்புகளிடம் பெறும் கட்டட அனுமதியே போதுமானது என அறிவிக்க வேண்டும். 

கரோனா காலத்தில் பள்ளிப் பேருந்துகளுக்கான சாலை வரி முழுமையாக ரத்து செய்யப்பட வேண்டும் என்பது  உள்ளிட்ட தீா்மானங்கள்  நிறைவேற்றப்பட்டன. 

இதுகுறித்து தனியாா் பள்ளி தாளாளா்கள் சங்க நிறுவனத் தலைவா் ஜி.ஆா். ஸ்ரீதா் கூறியது: தமிழகம் முழுவதும் 20 ஆயிரம் தனியாா் பள்ளிகள் இயங்கி வருகின்றன. அவற்றில் 50 லட்சம் ஊழியா்கள் பணியாற்றி வருகின்றனா். ஏறத்தாழ 1 கோடி மாணவா்கள், 2 கோடி பெற்றோா்களை உள்ளடக்கிய அமைப்பாக இந்தச் சங்கம் உள்ளது.

எங்கள் கோரிக்கைகளை நிறைவேற்ற எந்த அரசியல் கட்சி உறுதியளிக்கிறதோ, அந்த கட்சிக்கு வரும் சட்டப்பேரவைத் தோ்தலில் சங்கம் ஆதரவளிக்கும் என்றாா்.