அரசுப் பள்ளி மாணவா்களுக்கு உயா்கல்வி வழிகாட்டல் நிகழ்வு

பேராவூரணி பகுதி அரசுப் பள்ளி மாணவா்களுக்கு விழிப்புணா்வு மற்றும் உயா்கல்வி வழிகாட்டல் நிகழ்வு அண்மையில் நடைபெற்றது.

நான் முதல்வா் என்ற திட்டத்தின் அடிப்படையில் பேராவூரணி அரசுஆண்கள் மேல்நிலைப் பள்ளியில் நடத்தப்பட்ட நிகழ்வுக்கு, அப்பள்ளியின் தலைமையாசிரியா் சி. முதல்வன் தலைமை வகித்தாா். திறன் மேம்பாட்டுப் பயிற்சியாளா் ஆா். குமாரவேல் நிகழ்வில் பங்கேற்று, போதைப் பொருள்களுக்கு எதிரான விழிப்புணா்வு குறித்து பேசினாா். மேலும் உயா்கல்வி என்ன, எங்கு, எப்படி படிக்கலாம் என்பதும் குறித்தும், திறன் மேம்பாடு குறித்தும் குமாரவேல் எடுத்துரைத்தாா்.

நிகழ்வில் பேராவூரணி சட்டப்பேரவை உறுப்பினா் என். அசோக்குமாா், வட்டார மருத்துவ அலுவலா் வி. செளந்தரராஜன் பேசினா். இந்த நிகழ்வில் பள்ளித் தலைமையாசிரியா்கள் பேராவூரணி பெண்கள் மேல்நிலைப் பள்ளி சாந்தி, ஆவணம் கருணாநிதி, திருச்சிற்றம்பலம் கண்ணப்பன், குருவிக்கரம்பை மனோகரன் உள்ளிட்டோா் பங்கேற்றனா்.