ஆசிரியையை கொலை செய்த இளைஞா் குண்டா் சட்டத்தில் கைது

தஞ்சாவூா் மாவட்டம், மல்லிப்பட்டினம் அருகே பள்ளிக்குள் புகுந்து ஆசிரியையை கொலை செய்த இளைஞரை குண்டா் தடுப்புக் காவல் சட்டத்தின் கீழ் புதன்கிழமை கைது செய்யப்பட்டாா்.

தஞ்சாவூா் மாவட்டம், மல்லிப்பட்டினம் அருகே சின்னமனை கிராமத்தைச் சோ்ந்தவா் செல்வம் மகன் மதன்குமாா் (28). இவா், தன்னை திருமணம் செய்து கொள்ள மறுத்த அதே பகுதியைச் சோ்ந்த தனது காதலியான மல்லிப்பட்டினம் அரசு மேல்நிலைப் பள்ளி தற்காலிக ஆசிரியை ரமணியை (26) நவம்பா் 20-ஆம் தேதி பள்ளிக்குள் புகுந்து கொலை செய்தாா்.

இதுகுறித்து சேதுபாவாசத்திரம் காவல் நிலையத்தினா் வழக்குப் பதிந்து மதன்குமாரைக் கைது செய்தனா். இந்நிலையில், மாவட்டக் காவல் கண்காணிப்பாளா் ஆஷிஷ் ராவத் பரிந்துரையின் பேரில், இவரை குண்டா் தடுப்புக் காவல் சட்டத்தின் கீழ் கைது செய்யுமாறு மாவட்ட ஆட்சியா் பா. பிரியங்கா பங்கஜம் புதன்கிழமை உத்தரவிட்டாா். இதையடுத்து, மதன்குமாா் கைது செய்யப்பட்டு, திருச்சி மத்திய சிறையில் அடைக்கப்பட்டாா்.