மழை நீரில் மூழ்கிய நெற்பயிா்களை மீட்கும் வழிமுறைகள்

தஞ்சாவூா் மாவட்டம், பாபநாசம் வட்டத்தில் நீரில் மூழ்கிய நெற்பயிா்களை மீட்பது குறித்து பாபநாசம் வேளாண் உதவி இயக்குநா் வியாழக்கிழமை ஆலோசனை வழங்கினாா்.

இதுகுறித்து பாபநாசம் வேளாண் உதவி இயக்குநா் முகமது பாரூக் தெரிவித்திருப்பது:

தற்போது வடகிழக்கு பருவமழை காரணமாக நெற்பயிா்கள் நீரில் மூழ்கியுள்ளன. நாற்றங்கால் பருவத்தின்போது கூடுதல் நீரை வடிகட்ட வேண்டும். வளா்ச்சி பருவத்தின்போது கூடுதல் நீரை வடிகட்ட வேண்டும். ஒரு சதவீத யூரியா கரைசல் அதாவது ஒரு ஏக்கருக்கு 2 கிலோ யூரியா மற்றும் 1 கிலோ சிங்க் சல்பேட் உரங்களை 200 லிட்டா் தண்ணீரில் கலந்து தெளிக்க வேண்டும். நோய் எதிா்ப்பு சக்தியை அதிகரிக்க ஏக்கருக்கு 1 கிலோ சூடோமோனாஸ் நுண்ணுயிரியினை 20 கிலோ மணல் அல்லது தொழு உரத்துடன் கலந்து இட வேண்டும்.

பூச்சி மற்றும் நோய்த் தாக்குதலைக் கட்டுப்படுத்த, பூக்கும் மற்றும் பால் பிடிக்கும் பருவத்தின்போது வயலில் உள்ள கூடுதல் நீரை வடிகட்ட வேண்டும். 2 சதவீத டிஏபி கரைசல் தெளிக்க வேண்டும். ஏக்கருக்கு 50 கிலோ அமோனியம் சல்பேட் அல்லது 22 கிலோ யூரியாவுடன் 16 கிலோ பொட்டாஷ் கலந்து மேல் உரமாக இட வேண்டும். ஒருங்கிணைந்த பயிா் பாதுகாப்பு முறைகளைக் கடைப்பிடிக்க வேண்டும்.