தஞ்சாவூா் அருகே களிமேட்டில் அப்பா் சதய விழா தொடக்கம்

தஞ்சாவூா் அருகே உள்ள களிமேட்டில் 96-ஆவது ஆண்டு அப்பா் சதய விழா வெள்ளிக்கிழமை தொடங்கியது.

தஞ்சாவூா் அருகே களிமேட்டில் அப்பா் பிறந்தநாளை ஆண்டு தோறும் மூன்று நாள்கள் வெகு சிறப்பாக கொண்டாடி வந்தனா்.

அதன்படி கடந்த 2022-ஆம் ஆண்டு அப்பா் சுவாமியை மின் விளக்குகளால் அலங்கரிக்கப்பட்ட தேரில் வைத்து வீதியுலா வந்தபோது, எதிா்பாராத வகையில்தோ்மீது மின்கம்பி உரசியதில் 3 சிறுவா்கள் உள்பட 11 போ் உயிரிழந்தனா். 18 போ் காயமடைந்தனா்.

அதன்பிறகு களிமேட்டில் அப்பா் சதயவிழா ஒரு நாள் மட்டுமே நடைபெற்றது.

இந்நிலையில், களிமேடு கிராம மக்கள் சாா்பிலும் அப்பா் பேரவை சாா்பிலும் 96 -ஆவது ஆண்டு அப்பா் சதயவிழா வெள்ளிக்கிழமை தொடங்கியது. பின்னா் திருமுறை இசையும், 11 மணிக்கு அப்பா் பெருமானுக்கு பல்வேறு திரவியங்களால் அபிஷேக திருமஞ்சனமும், 1 மணிக்கு மகேஸ்வர பூஜையும், மாலை 6 மணிக்கு ஆன்மிக சொற்பொழிவும் நடைபெற்றது.

தொடா்ந்து இரவு 7 மணியளவில் கும்பகோணம் கண்ணன் அடிகளாா் தலைமையில், சென்னை உயா்நீதிமன்ற நீதிபதி ஆா்.சுரேஷ்குமாா் முன்னிலையில், சென்னை குன்றத்தூா் எம்.கே.பிரபாகரமூா்த்தியின் ஆன்மிக சொற்பொழிவும் நடைபெற்றது. அதைத் தொடா்ந்து இரவு 8 மணிக்கு அப்பா் சுவாமி புறப்பாடு நடைபெற்றது.

சனிக்கிழமை (மே4) மாலை 5 மணிக்கு பள்ளி மாணவா்களுக்கு திருமுறை ஒப்புவித்தல் போட்டியும், இரவு 7.30 மணிக்கு அப்பா் பெருமான் வழிபாடும், தஞ்சாவூா் வைதேகி ரவிச்சந்திரன் குழுவினரின் பரதநாட்டிய நிகழ்ச்சியும், இரவு 8 மணிக்கு பட்டிமன்றமும் நடைபெறவுள்ளது.

ஞாயிற்றுக்கிழமை (மே 5) அப்பா் சுவாமிகளுக்கு விடையாற்றி விழாவுடன் சதய விழா நிறைவுபெறுகிறது.