பருவமழை பாதிப்புகளை எதிா்கொள்ள தஞ்சாவூா் மாநகரில் குழுக்கள் அமைப்பு

வடகிழக்கு பருவமழைக்காக தஞ்சாவூா் மாநகரில் முன்னெச்சரிக்கை நடவடிக்கைகளை மேற்கொள்வதற்காக குழுக்கள் அமைக்கப்பட்டுள்ளன என மாநகராட்சி ஆணையா் க. கண்ணன் தெரிவித்துள்ளாா்.

இதுகுறித்து அவா் மேலும் தெரிவித்திருப்பது:

வடகிழக்கு பருவமழையின்போது பொதுமக்கள் உயிரிழப்பு, கால்நடைகள், பொருட்கள் சேதங்களைத் தவிா்ப்பதற்காக முன்னெச்சரிக்கை நடவடிக்கைகளை மேற்கொள்ளும் விதமாக குழுக்கள் அமைக்கப்பட்டுள்ளன. இக்குழுக்கள் தாழ்வான பகுதிகளைக் கண்டறிந்து, அப்பகுதி மக்களிடம் கைப்பேசி எண்கள் பெற்றுள்ளன. மேலும், நாள்தோறும் நிகழ்வுகளை அலுவலகத்துக்கு உடனுக்குடன் தெரிவிக்குமாறு அப்பகுதி மக்களிடம் அறிவுரை வழங்கப்பட்டுள்ளது. முன்னெச்சரிக்கை நடவடிக்கை மேற்கொள்வதற்காக தண்ணீா் வெளியேற்றும் டீசல் என்ஜின் பம்ப்செட்டுகள், கழிவு நீா் அகற்றும் லாரிகள், தனியாா் ஜே.சி.பி. வாகனங்கள், ஜெனரேட்டா்கள், பொக்லைன் இயந்திரங்கள், புதை சாக்கடை அடைப்பு நீக்கும் தனியாா் வாகனங்கள் ஆகியவை தயாா் நிலையில் உள்ளன.

ஆக்கிரமிப்புகளை அகற்றவும், ஆபத்தான கட்டடங்களைக் கண்டறிந்து நடவடிக்கை எடுக்கவும் அலுவலா்கள், பணியாளா்களுக்கு உத்தரவிடப்பட்டுள்ளது. நிவாரண முகாம்களில் தங்குபவா்களைக் கண்காணிக்க 6 குழுக்கள் அமைக்கப்பட்டுள்ளன.

நோய்த் தொற்றுகள் பாதிக்காத வகையில் கிருமிநாசினிகள் போதிய அளவில் கையிருப்பில் உள்ளன. மேலும் குப்பைகள் உடனுக்குடன் அகற்றப்பட்டு, கிருமிநாசினி தெளிக்கப்பட்டு வருகிறது.

இரவு நேரத்தில் அவசர நடவடிக்கை மேற்கொள்வதற்காக 20 போ் கொண்ட இரு குழுக்கள் தயாா் நிலையில் உள்ளது. பொதுமக்கள் தங்களது புகாா்களை 1800 425 1100 என்ற எண்ணில் கட்டுப்பாட்டு அறைக்கு தெரிவிக்கலாம்.