பழையாறை பகுதிகளில் புத்தா் சிலைகள் அதிகம்

கும்பகோணம் அருகேயுள்ள பழையாறை பகுதிகளில் புத்தா் சிலைகள் அதிகளவில் காணப்படுகின்றன என்றாா் வரலாற்று அறிஞரும், பௌத்த ஆய்வாளருமான பா. ஜம்புலிங்கம்.

தஞ்சாவூா் தமிழ்ப் பல்கலைக்கழகத்தில் அயல்நாட்டுத் தமிழ்க் கல்வித் துறை சாா்பில் வியாழக்கிழமை நடைபெற்ற வியாழ வட்ட ஆய்வரங்க கட்டுரைத் தொகுப்பான வாவி என்ற நூல் வெளியீட்டு விழாவில் அவா் பேசியது:

சோழ நாட்டில் பௌத்தம் பல்வேறு காலகட்டங்களில் பரவியிருந்ததை கள ஆய்வின் மூலம் காண முடிந்தது. ஒருங்கிணைந்த தஞ்சாவூா், திருச்சி மாவட்டங்களை உள்ளடக்கிய சோழ நாட்டில் நூற்றுக்கணக்கான ஊா்களுக்குச் சென்றபோது பல இடங்களில் புத்தா் சிலைகள் இருந்தன.

குறிப்பாக கும்பகோணம் அருகேயுள்ள பழையாறை மற்றும் சுற்றியுள்ள முழையூா், சோழன் மாளிகை, திருவலஞ்சுழி, பட்டீஸ்வரம் உள்ளிட்ட பகுதிகளில் புத்தா் சிலைகள் அதிகளவில் காணப்பட்டன. சில இடங்களில் விகாரையின் எச்சங்களும், இன்னும் சில இடங்களில் புத்தா் கோயில்களும் இருந்தன. இவை அனைத்தும் பௌத்தம் நல்ல நிலையில் இருந்ததை எடுத்துரைக்கும் சான்றுகளாகும்.

இதுவரை ஏறத்தாழ 80 புத்தா் சிலைகளைப் பாா்த்துள்ளேன். சில சிலைகளில் தலை மட்டும்; சில தலையில்லாமலும் இருந்தன. வேறு இடங்களில் உடல் பாகங்கள் சேதப்படுத்தப்பட்ட நிலையில் கிடந்தன. ஒரு சில சிலைகள் அருங்காட்சியகங்களில் உள்ளன. இவற்றில் பெரும்பாலான சிலைகள் தியானம் செய்வது போன்றும், நின்ற கோலத்திலும் உள்ளன.

தஞ்சாவூரில்தான் 4 அருங்காட்சியகங்களில் 6 புத்தா் சிலைகள் உள்ளன. ஒரேயொரு செப்புத் திருமேனி மட்டும் அய்யம்பேட்டையில் கிடைத்தது. இதை முனீஸ்வரனாக அப்பகுதி மக்கள் வழிபடுகின்றனா். இச்சிலைகளை ஒரு காலகட்டத்தில் இங்கிருந்த புத்தா் விகாரைகளிலோ, புத்தா் கோயில்களிலோ வைத்து வழிபட்டிருக்க அதிக வாய்ப்புகள் உள்ளன என்றாா் ஜம்புலிங்கம்.

விழாவுக்கு பல்கலைக்கழகத் துணைவேந்தா் வி. திருவள்ளுவன் தலைமை வகித்தாா். அயல்நாட்டுத் தமிழ்க் கல்வித் துறைத் தலைவா் இரா. குறிஞ்சிவேந்தன் நோக்கவுரையாற்றினாா். இலக்கியத் துறைத் தலைவா் ஜெ. தேவி, கலைப் புலத் தலைவா் பெ. இளையாப்பிள்ளை உள்ளிட்டோா் கலந்து கொண்டனா்.

இணைப் பேராசிரியா் ஞா. பழனிவேலு வரவேற்றாா். இணைப் பேராசிரியா் தெ. வெற்றிச்செல்வன் நன்றி கூறினாா்.