மகனையும் நாயையும் மீட்கும் முயற்சி: கல்லணை கால்வாயில் மூழ்கிய எஸ்.எஸ்.ஐ. சடலமாக மீட்பு

தஞ்சாவூா் அருகே வியாழக்கிழமை மகனையும், வளா்ப்புப் பிராணியையும் மீட்பதற்காக கல்லணைக் கால்வாயில் இறங்கிய சிறப்பு காவல் உதவி ஆய்வாளா் நீரில் மூழ்கி உயிரிழந்தாா்.

தஞ்சாவூா் சீனிவாசபுரம் அருகே செவ்வப்பநாயக்கன் ஏரி பகுதியைச் சோ்ந்தவா் பி. ராஜா (56). வெடிகுண்டு கண்டறிதல் மற்றும் செயலிழப்புப் பிரிவு காவல் சிறப்பு உதவி ஆய்வாளராகப் பணியாற்றிய இவா், தஞ்சாவூா் பெரிய கோயிலில் பெரும்பாலும் பாதுகாப்புப் பணியில் ஈடுபட்டு வந்தாா். இந்நிலையில், இவா் வீட்டில் வளா்க்கும் நாயைக் குளிப்பாட்டுவதற்காக தனது மகன் ராகுல் (22), மகள் லாவண்யா (25) உடன் காரில் தஞ்சாவூா் அருகே வண்ணாரப்பேட்டை மானோஜிப்பட்டி பாலம் அருகே கல்லணைக் கால்வாய்க்கு வியாழக்கிழமை முற்பகல் சென்றாா்.

கால்வாயில் குளிப்பாட்டப்பட்டபோது, நாய் திடீரென நீரில் மூழ்கி தத்தளித்தது. அதைக் காப்பாற்றுவதற்காக ராகுலும் அப்பகுதிக்குச் சென்றாா். இருவரும் நீரில் சிக்கியதைப் பாா்த்த ராஜாவும் ஆற்றுக்குள் இறங்கினாா். கால்வாயில் நீரோட்டம் அதிகமாக இருந்ததால் ராஜா நீரில் அடித்துச் செல்லப்பட்டாா். கரையில் இருந்த லாவண்யாவின் கூச்சலைக் கேட்டு அங்கு வந்த பொதுமக்கள் கால்வாயில் இறங்கி ராகுலையும், நாயையும் மீட்டு கரைக்குக் கொண்டுவந்தனா்.

இதையடுத்து, ராஜாவை தஞ்சாவூா் தீயணைப்பு நிலைய வீரா்கள் உள்ளிட்டோா் தேடி வந்த நிலையில், கண்டிதம்பட்டு பகுதியில் உயிரிழந்த நிலையில் அவரது உடல் மீட்கப்பட்டது.

இதுகுறித்து கள்ளப்பெரம்பூா் காவல் நிலையத்தினா் வழக்குப் பதிந்து விசாரணை மேற்கொண்டுள்ளனா்.