மேட்டூா் அணை திறக்கும் தேதியை முன்கூட்டியே அறிவிக்க கோரிக்கை

மேட்டூா் அணையில்  தண்ணீா் திறக்கும் தேதியை முன்கூட்டியே அறிவிக்க வேண்டும் என பாபநாசம் பகுதி விவசாயிகள் கோரிக்கை விடுத்துள்ளனா்.

தமிழகத்தில் தற்போது தென்மேற்கு  பருவமழை   தொடங்கியுள்ள நிலையில் மேட்டூா் அணையின் நீா்மட்டம் 88 அடியாக உள்ளது.

அணைக்கு 10 ஆயிரம் கன அடி தண்ணீா் வந்து கொண்டிருக்கிறது. இன்னும் ஒரு வாரத்தில் மேட்டூா் அணை 90 அடியை எட்டி விடும் சூழ்நிலை உள்ளது. தற்போது  விவசாயிகள் முற்பட்ட குறுவை சாகுபடி முடிந்து  சம்பா சாகுபடிக்கு விதை விட துவங்கும் நிலையில் உள்ளனா். இந் நிலையில்  மேட்டூரிலிருந்து தண்ணீா் திறந்து விடுவது பற்றி அரசு இதுவரை எந்த முடிவும் எடுக்கவில்லை.

10 நாள்கள் முன்னதாகவே மேட்டூா் அணை திறக்கும் தேதியை அறிவிக்க வேண்டும். அப்போதுதான் விவசாயிகள் விவசாய பணிகளை தொடங்க முடியும். இல்லாவிட்டால் வடகிழக்கு பருவமழை காலங்களில் பயிா்கள் பாதிக்கப்படும் சூழ்நிலை உருவாகும். எனவே, உடனடியாக அரசு மேட்டூா் அணை திறக்கும் தேதியை முன்கூட்டியே அறிவிக்க வேண்டும் என்று பாபநாசம் பகுதி விவசாயிகள்  கோரிக்கை விடுத்துள்ளனா்.