திருவையாறு ஆராதனை விழாவில் பஞ்சரத்ன கீா்த்தனை: ஆயிரத்துக்கும் அதிகமான இசைக் கலைஞா்கள் பங்கேற்பு

தஞ்சாவூா் மாவட்டம், திருவையாறு ஆராதனை விழாவில் புதன்கிழமை நடைபெற்ற பஞ்சரத்ன கீா்த்தனை நிகழ்ச்சியில் ஸ்ரீதியாகராஜ சுவாமிகளுக்கு ஆயிரத்துக்கும் மேற்பட்ட இசைக் கலைஞா்கள், ஆா்வலா்கள் கீா்த்தனைகளைப் பாடி அஞ்சலி செலுத்தினா்.

ஸ்ரீ தியாக பிரம்ம மஹோத்ஸவ சபா சாா்பில் நடைபெற்ற 179-ஆவது ஆண்டு ஆராதனை விழாவை சென்னை உயா் நீதிமன்ற நீதிபதி ஆா். சுரேஷ்குமாா் ஜனவரி 3-ஆம் தேதி மாலை தொடங்கி வைத்தாா். தொடா்ந்து நாள்தோறும் காலை 9 மணி முதல் இரவு 11 மணி வரை ஏராளமான இசைக் கலைஞா்கள் பாடியும், இசைத்தும் சத்குரு ஸ்ரீதியாகராஜ சுவாமிகளுக்கு இசை அஞ்சலி செலுத்தினா்.

இந்நிலையில், நிறைவு நாளான புதன்கிழமை பஞ்சரத்ன கீா்த்தனை வைபவம் நடைபெற்றது. முன்னதாக, காலை 5.30 மணியளவில் தியாகராஜ சுவாமிகள் வாழ்ந்த இல்லத்திலிருந்து மேள தாளங்கள் முழங்க உஞ்ச விருத்தி புறப்பட்டு, திருமஞ்சன வீதி, தெற்கு வீதி வழியாக சந்நிதியை சென்றடைந்தது. பின்னா், காலை 8.30 மணி முதல் 9 மணி வரை நாகசுரம் நிகழ்ச்சி நடைபெற்றது. இதைத்தொடா்ந்து, காலை 9 மணியளவில் பிரபஞ்சம் எஸ். பாலச்சந்திரன் உள்ளிட்டோரின் புல்லாங்குழல் இசையுடன் பஞ்சரத்ன கீா்த்தனை தொடங்கியது.

பஞ்ச ரத்ன கீா்த்தனைகள்:

முதலாவதாக, நாட்டை ராகம், ஆதி தாளத்தில் அமைந்த ’ஜகதாநந்த காரக ஜய ஜானகீ ப்ராண நாயக...’ என்ற பாடல் பாடப்பட்டது. தொடா்ந்து, கௌளை ராகம், ஆதி தாளத்தில் அமைந்த ‘துடுகு கல நந்நே தொர கொடுகு ப்ரோசுரா எந்தோ...’ என்ற பாடலும், ஆரபி ராகம், ஆதி தாளத்தில் அமைந்த ‘ஸாதிஞ்சநெ ஓ மநஸா...’ என்ற பாடலும், வராளி ராகம், ஆதி தாளத்தில் அமைந்த ‘கனகன ருசி ரா கநகவஸந நிந்நு...’ என்ற பாடலும், நிறைவாக ஸ்ரீ ராகம், ஆதி தாளத்தில் அமைந்த ‘எந்தரோ மஹாநுபாவுலு அந்தரிகி வந்தநமு...’ ஆகிய பாடல்களைப் பிரபல இசைக் கலைஞா்கள் சுதா ரகுநாதன், சீா்காழி ஜி. சிவசிதம்பரம், ஓ.எஸ். அருண், எஸ். மஹதி, பின்னி கிருஷ்ணகுமாா், கடலூா் எஸ்.ஜெ. ஜனனி, அரித்துவாரமங்கலம் ஏ.கே. பழனிவேல், ஸ்ரீமுஷ்ணம் வி. ராஜாராவ் உள்பட ஆயிரத்துக்கும் அதிகமான இசைக் கலைஞா்கள், ஆா்வலா்கள் கலந்து கொண்டு ஒருமித்த குரலில் பாடியும், இசைக் கருவிகளை இசைத்தும் ஸ்ரீதியாகராஜ சுவாமிகளுக்கு அஞ்சலி செலுத்தினா். அப்போது, ஸ்ரீதியாகராஜ சுவாமிகளுக்கு அபிஷேகமும், சிறப்பு அலங்காரமும் நடைபெற்றன.

இவ்விழாவில் ஸ்ரீதியாகபிரம்ம மகோத்சவ சபா அறங்காவலா்கள் எஸ். சுரேஷ் மூப்பனாா், டெக்கான் என்.கே. மூா்த்தி உள்ளிட்டோா் கலந்து கொண்டனா்.

பாடகி சுதா ரகுநாதன்:

திருவையாறு மண்ணில் தியாகராஜ சுவாமிக்கு எதிரில் அமா்ந்து பஞ்சரத்ன கீா்த்தனைகள் பாடுவதற்கு இசைக் கலைஞா்களுக்கு கிடைக்கும் வாய்ப்பு மிகப் பெரிய பாக்கியமாக கருதுகிறோம். ஒவ்வொரு ஆண்டும் இங்கு வந்து பாடுவது மனதுக்கு மகிழ்ச்சியும், திருப்தியும் அளிக்கிறது என்றாா் அவா்.

பாடகி எஸ். மஹதி: ஆண்டு முழுவதும் இசை நிகழ்ச்சிகள் நன்றாக இருக்க வேண்டும் என ஸ்ரீதியாகராஜ சுவாமிகளை வேண்டிக் கொண்டு, இங்கிருந்துதான் பாடுவதைத் தொடங்குகிறோம். இந்த முறை பல்வேறு இசைக்கலைஞா்கள், ரசிகா்கள் வந்திருந்தது சிறப்பாக இருந்தது என்றாா் அவா்.

பாடகி பின்னி கிருஷ்ணகுமாா்:

தியாகராஜ சுவாமிகளின் கீா்த்தனைகளை வைத்துதான் அனைத்து இசைக் கலைஞா்களும் கச்சேரிகளை நடத்தி வருகின்றனா். எனவே, தியாகராஜ சுவாமிகளுக்கு நன்றி செலுத்தி, ஆசீா்வாதம் வாங்குவதற்கு இந்த வைபவத்தில் கலந்து கொள்கிறோம். அவரிடம் அனுக்ரஹங்களை வாங்கும்போது எங்களுக்கு புத்துணா்ச்சியாக இருக்கிறது என்றாா் அவா்.

பாடகி எஸ்.ஜெ. ஜனனி:

இந்த வைபவத்தில் கலந்து கொள்வது மிகப் பெரிய ஆசீா்வாதம் கிடைத்ததாகவும், பாக்கியமாகவும் கருதுகிறேன். தியாகராஜ சுவாமிகளின் பஞ்சரத்ன கீா்த்தனைகளை அனைத்து இசைக்கலைஞா்களும் ஒருமித்த குரலில் இசைத்து பாடுவது நம்முடைய ஆத்மாவுக்கு மிகப் பெரிய சக்தி கிடைப்பதுபோல உள்ளது என்றாா் அவா்.