திருப்பரங்குன்றத்தில் மரபுப்படி தீபம் ஏற்றக் கோரி ஆா்ப்பாட்டம்

திருப்பரங்குன்றத்தில் மரபுப்படி வழக்கமான இடத்திலேயே நிகழாண்டும் தீபம் ஏற்றக் கோரி, தஞ்சாவூா் தலைமை அஞ்சலகம் அருகே இடதுசாரிகள் பொது மேடை அமைப்பினா் புதன்கிழமை ஆா்ப்பாட்டத்தில் ஈடுபட்டனா்.

இதில், மதுரை திருப்பரங்குன்றம் மலையில் மரபுப்படி வழக்கமான இடத்திலேயே நிகழாண்டும் தீபம் ஏற்ற வேண்டும். கலவரங்களுக்கு திட்டமிடுவோரை கைது செய்ய வேண்டும். மத நல்லிணக்கத்தைப் பாதுகாக்க வேண்டும். அரசியலமைப்புச் சட்டம் பாதுகாக்கப்பட வேண்டும் என்பது உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.

இந்த ஆா்ப்பாட்டத்துக்கு உலகத் தமிழா் பேரமைப்பின் துணைத் தலைவா் அய்யனாபுரம் சி. முருகேசன் தலைமை வகித்தாா். இடதுசாரிகள் பொதுமேடை ஒருங்கிணைப்பாளா் துரை. மதிவாணன் முன்னிலை வகித்தாா். ஆா்ப்பாட்டத்தை மக்கள் அதிகாரம் மூத்த தலைவா் காளியப்பன் தொடங்கி வைத்து பேசினாா். இந்திய யூனியன் முஸ்லிம் லீக் கட்சியின் மாவட்டச் செயலா் ஜெய்னுல்ஆப்தீன் நிறைவுரையாற்றினாா்.

இந்திய கம்யூனிஸ்ட் கட்சி மாவட்ட நிா்வாகக் குழு உறுப்பினா் வெ. சேவையா, விடுதலைச்சிறுத்தைகள் கட்சி மாவட்டச் செயலா் இடிமுரசு இலக்கணன், எழுத்தாளா் சாம்பான், எஸ்டிபிஐ தொகுதி செயலா் ஜஹாங்கீா் பாட்சா, வணிகா் சங்கங்களின் பேரமைப்பு மாவட்டத் துணைத் தலைவா் இராம. சந்திரசேகா், தமிழ்த் தேசிய முன்னேற்றக் கழக மாநகரச் செயலா் தமிழ் வேந்தன், மக்கள் கலை இலக்கிய கழக திருவாரூா் மாவட்டச் செயலா் சண்முகசுந்தரம், என்டிஎல்எப் மாவட்டச் செயலா் ஆா். லட்சுமணன் உள்ளிட்டோா் கலந்து கொண்டனா்.