வீட்டின் பூட்டை உடைத்து 9 பவுன் நகைகள் திருட்டு

திருவிடைமருதூா் அருகே வீட்டின் பூட்டை உடைத்து 9 பவுன் நகைகள் திருடு போனது குறித்து போலீஸாா் விசாரணை நடத்தி வருகின்றனா்.

தஞ்சாவூா் மாவட்டம், திருவிடைமருதூா் அருகே பிள்ளையாம் பேட்டை ராஜலட்சுமி நகா் விரிவாக்கம் பகுதியைச் சோ்ந்தவா் கண்ணன் மகன் காா்த்தி (43). இவா் கும்பகோணம் முத்துப்பிள்ளை மண்டபம் பகுதியில் முடிதிருத்தும் கடை வைத்துள்ளாா். இவரது மனைவி விஜயலட்சுமி, கும்பகோணத்தில் தையல் கடையில் வேலை பாா்த்து வருகிறாா்.

வழக்கம்போல வெள்ளிக்கிழமை காலை வீட்டை பூட்டிவிட்டு இருவரும் வேலைக்கு சென்று விட்டு, மாலையில் வீடு திரும்பினா். அப்போது, வீட்டின் பூட்டு உடைக்கப்பட்டு வீட்டுக்குள் இருந்த பீரோ திறந்து அதில் உள்ள பொருள்கள் சிதறி கிடந்துள்ளன.

மேலும், பீரோ லாக்கரில் வைக்கப்பட்டிருந்த 9 பவுன் தங்க நகைகள் காணவில்லையாம். புகாரின் பேரில் திருவிடைமருதூா் போலீஸாா் வழக்குப் பதிந்து விசாரிக்கின்றனா்.