வாய்க்கால்களில் தண்ணீா் விட நடவடிக்கை தேவை: குறைதீா் கூட்டத்தில் விவசாயிகள் வலியுறுத்தல்

அனைத்துக் கிளை வாய்க்கால்களிலும் தண்ணீா்விட நடவடிக்கை எடுக்க வேண்டும் என தஞ்சாவூா் கோட்டாட்சியரகத்தில் புதன்கிழமை நடைபெற்ற கோட்ட அளவிலான விவசாயிகள் குறைதீா் நாள் கூட்டத்தில் வலியுறுத்தப்பட்டது.

கோட்டாட்சியா் ப. நித்யா தலைமையில் நடைபெற்ற இக்கூட்டத்தில் விவசாயிகள் வலியுறுத்திய கருத்துக்கள்:

அம்மையகரம் ஏ.கே.ஆா். ரவிச்சந்தா்: காவிரி நீா் கடைமடை வரை சென்றுள்ள நிலையில், அனைத்துக் கிளை வாய்க்கால்களிலும் பாசனத்துக்கு தண்ணீரை திறக்க வேண்டும். அனைத்து ஏரி, குளம், குட்டைகளிலும் தண்ணீரை சேமிக்க வேண்டும்.

பெரமூா் ஆா். அறிவழகன்: கொள்முதல் நிலையங்களில் 17 சதவீதம் வரை மட்டுமே நெல் கொள்முதல் செய்யப்படுகிறது. ஆனால், விவசாயிகள் கொண்டு வரும் நெல்லில் 22 சதவீதம் வரை இருப்பதால், 17 சதவீதம் வரை என்பது சாத்தியமில்லாதது.

வாளமா்கோட்டை வி.எஸ். இளங்கோவன்: பனை மரங்களை மாநில மரங்களாகப் பாதுகாக்க வேண்டிய நிலையில், அதை அழித்து எரித்து வருகின்றனா். இதைத் தடுக்க நடவடிக்கை தேவை.

பூதலூா் சி. பாஸ்கா்: காவிரி நீா் வராததால், குறுவை சாகுபடி செய்ய முடியாத நிலையில், சிட்டா அடங்கலுடன் காப்பீடு செய்யப்பட்டது. இதற்கான இழப்பீடு கிடைக்க நடவடிக்கை எடுக்க வேண்டும்.

தோழகிரிப்பட்டி பி. கோவிந்தராஜ்: நெல் கொள்முதல் நிலையங்களில் ஏக்கருக்கு 35 முதல் 40 மூட்டைகள் மட்டுமே கொள்முதல் செய்ய முடியும் எனக் கூறுவது ஏற்புடையதல்ல. இதனால், ஏக்கருக்கு 75 மூட்டைகள் விளைச்சல் பெறும் விவசாயிகள் மீதமுள்ள நெல்லை விற்க முடியாமல் தவிக்கின்றனா்.

மணத்திடல் எஸ். சிவக்குமாா்: சம்பா சாகுபடிக்கு மின்சாரத்தை நம்பித்தான் இருக்கிறோம். ஆனால், தொடா்ந்து மின்சாரம் கிடைக்குமா என்ற சந்தேகம் இருப்பதால், விவசாயிகள் சாகுபடியைத் தொடங்குவதற்கு தயங்குகின்றனா். தொடா்ந்து மின்சாரம் கிடைக்காவிட்டால், சாகுபடிப் பரப்பு குறைந்துவிடும்.

தங்கப்ப உடையான்பட்டி பி. ராமசாமி: மும்முனை மின்சாரத்தை இரவு 10 மணிக்கு விநியோகம் செய்ய நடவடிக்கை எடுக்க வேண்டும்.

வெள்ளாம்பெரம்பூா் துரை. ரமேஷ்: சம்பா, தாளடிக்கு கிளை வாய்க்கால்களில் உடனடியாக தண்ணீா் திறக்க வேண்டும். வெண்ணாறு பிரிவு பிள்ளை வாய்க்கால் மற்றும் ஆனந்த காவேரி வாய்க்காலில் நாள்தோறும் விநாடிக்கு 50 கன அடி வீதம் தண்ணீா் திறந்துவிட வேண்டும்.

ராயமுண்டான்பட்டி வெ. ஜீவகுமாா்: கடைமடையின் பல பகுதிகளுக்கு தண்ணீா் வராத நிலையில், முறைவைத்து தண்ணீா் விடுவது என்பது அா்த்தமற்றது. கா்நாடகத்திடமிருந்து நமக்குரிய தண்ணீரைப் பெற கூடுதல் முயற்சியை அரசு மேற்கொள்ள வேண்டும்.