கத்தியைக் காட்டி மிரட்டி பணம் பறிக்க முயன்ற 2 பேர் கைது

கொள்ளிடம் டோல்கேட்டில் இளைஞரிடம் கத்தியைக் காட்டி மிரட்டி பணம் பறிக்க முயன்ற இரு  இளைஞர்கள் ஞாயிற்றுக்கிழமை கைது செய்யப்பட்டனர்.
திருச்சி மாவட்டம், கொள்ளிடம் டோல்கேட்டைச் சேர்ந்தவர் அப்சல்(27).  இவர் ஞாயிற்றுக்கிழமை பிற்பகலில் அப்பகுதியில் நின்றிருந்தார். அங்கு மது போதையில் வந்த இரு இளைஞர்கள் கத்தியைக் காட்டி மிரட்டி அப்சலிடம் பணம் பறிக்க முயன்றனர்.
அக்கம் பக்கத்தில் இருந்தவர்கள், இருவரையும் பிடித்து கொள்ளிடம் காவல் நிலையத்துக்கு தகவல் கொடுத்தனர்.
சார்பு ஆய்வாளர் ஜெயகுமார் தலைமையிலான போலீஸார், பிடிபட்ட இளைஞர்களிடம் விசாரணை நடத்தியதில், தாளக்குடி பஜனை மடத்தெருவைச் சேர்ந்த செல்வம் மகன் மணிகண்டன்(27), பகவதி மகன் கருணாநிதி(22) என்பது தெரிய வந்தது. இருவரையும் போலீஸார் கைது செய்தனர்.