"திருப்பதிக்கு விரைவில் சுற்றுலாப் பேருந்து'

திருச்சியிலிருந்து, திருப்பதி உள்ளிட்ட  இடங்களுக்கு விரைவில் சுற்றுலாப் பேருந்துகள் இயக்கப்படும் என்றார் மாநில சுற்றுலாத் துறை அமைச்சர் வெல்லமண்டி என்.நடராஜன்.
திருச்சியில்  மக்களவை உறுப்பினர் தொகுதி மேம்பாட்டு நிதி ரூ. 84 லட்சத்தில் மாநகர் முழுவதும் 300க்கும் மேற்பட்ட கண்காணிப்பு கேமராக்களை கண்காணிக்கும் நவீன காவல் கட்டுப்பாட்டு அறையை ஞாயிற்றுக்கிழமை பார்வையிட்ட அவர் மேலும் கூறியது: 
தமிழகம் சுற்றுலாத் துறையில் தொடர்ந்து முதலிடத்தில் உள்ளது. சென்னையிலிருந்து திருப்பதி தேவஸ்தானத்துடன் இணைந்து கோயில் தரிசனம், தங்குமிடம் உள்ளிட்டவற்றுடன் குறைந்த கட்டணத்தில் 
தினசரி 150 பேர் சென்று வரும் வகையில் சுற்றுலாப் பேருந்துகள் இயக்கப்படுவதைப் போல, திருச்சியிலிருந்தும் விரைவில் இயக்கப்பட உள்ளது. முக்கொம்பு, வண்ணத்துப்பூச்சி பூங்கா உள்ளிட்ட சுற்றுலாத் தலங்களுக்கு சென்று வர சாலைகள்  மேம்படுத்தப்படும் என்றார். அமைச்சர் எஸ்.வளர்மதி, மாவட்ட ஆட்சியர் கு. ராசாமணி, காவல் ஆணையர் அ. அமல்ராஜ் உள்ளிட்டோர் உடனிருந்தனர்.