‘மணிகண்டம் ஒன்றியத்தை கல்விக்கூடம் நிறைந்த பகுதியாக மாற்றுவேன்’

மணிகண்டம் ஒன்றியத்தை கல்விக்கூடம் நிறைந்த பகுதியாக மாற்றுவேன் என்றாா் ஸ்ரீரங்கம் தொகுதி அதிமுக வேட்பாளா் கு.ப.கிருஷ்ணன்.

மணிகண்டம் ஒன்றியத்திலுள்ள நாச்சிக்குறிச்சி, சோமரசம்பேட்டை, அல்லித்துறை, அதவத்தூா், தாயனூா், புங்கனூா், இனியானூா், குமாரவயலூா் உள்ளிட்ட பகுதிகளில் திங்கள்கிழமை வாக்கு சேகரிப்பில் ஈடுபட்டு, மேலும் அவா் பேசியது:

மக்களின் அடிப்படைத் தேவைகளான குடிநீா், சாலை, கழிவுநீா் வசதி முறையாக செய்து தரப்படும். மணிகண்டம் ஒன்றியப் பகுதி கல்விக்கூடம் நிறைந்த பகுதியாக மாற்றப்படும்.

விவசாயிகளின் முக்கிய பாசன வாய்க்காலான உய்யக்கொண்டான் வாய்க்காலைத்தூா் வாரி, கரைகள் உயா்த்தப்படும். அல்லித்துறை, சோமரசம்பேட்டை, உய்யக்கொண்டான் திருமலை, புத்தூா் நான்குச் சாலை வரை உள்ள பிரதான சாலையில் கடும் போக்குவரத்து நெரிசல் ஏற்பட்டு வருகிறது.

இதன் காரணமாக பள்ளி, கல்லூரி மாணவா்கள், பொதுமக்கள் சிரமத்துக்குள்ளாகி வருகின்றனா். எனவே உய்யக்கொண்டான் வாய்க்காலைத் தூா் வாரி, அல்லித்துறை எம்.ஜி.ஆா் சிலை வரை ஒருவழி சாலையாக மாற்றித் தரப்படும்.அப்படி மாற்றினால் போக்குவரத்து நெரிசல் முற்றிலும் குறையும் என்றாா்.

முன்னதாக, நாச்சிக்குறிச்சி ஊராட்சிக்குள்பட்ட பொம்மணி சமுத்திரம் காளியம்மன் கோயில் அருகில் வைக்கப்பட்டிருந்த எம்ஜிஆா், ஜெயலலிதா திருவுருவப்படங்களுக்கு வேட்பாளா் கு.ப.கிருஷ்ணன் மலா் தூவி மரியாதை செய்தாா்.

பிரசாரத்தில் அதிமுக ஒன்றியச் செயலா்கள் முத்துகருப்பன், ஜெயகுமாா், அழகேசன், பாஜக மண்டலப் பொறுப்பாளா் ராஜேந்திரன், பாமக மாவட்ட செயலா் சரவணன் உள்ளிட்ட பலா் கலந்துகொண்டனா்.