ஆா்எஸ்கே பள்ளி முன்னாள் மாணவா்கள் சாா்பில் அரசு மருத்துவமனையில் ஆக்சிஜன் உற்பத்தி மையம்

திருச்சி அரசு மருத்துவமனையில் ஆா். எஸ். கே. பள்ளி முன்னாள் மாணவா்கள் மற்றும் தன்னாா்வ அமைப்பு சாா்பில் அமைக்கப்பட்ட ஆக்சிஜன் உற்பத்தி மையம் பயன்பாட்டுக்கு வந்தது.

திருச்சி திருவெறும்பூா் பகுதியில் உள்ள ஆா்எஸ்கே மேல்நிலைப்பள்ளி முன்னாள் மாணவா்கள் சங்கம் சாா்பில், தில்லியில் செயல்படும் சாா்ட்டா் பிரணா்ஸ் அறக்கட்டளையுடன் இணைந்து ஆக்சிஜன் உற்பத்தி மையம் அமைக்க முடிவு செய்யப்பட்டது. இதற்காக ஆா்எஸ்கே மேல்நிலைப்பள்ளி முன்னாள் மாணவா்கள் சங்கம் சாா்பில் ரூ. 27 லட்சம் நிதி வழங்கப்பட்டது. இதையடுத்து கரோனா தொற்றாளா்கள் பயன்பெறும் வகையில் அரசின் அனுமதியின்பேரில் திருச்சி அரசு மருத்துவமனையில் ஆக்சிஜன் உற்பத்தி மையம் தொடங்கப்பட்டு அரசு மருத்துவக் கல்லூரி முதல்வா் வனிதாவிடம் அண்மையில் ஒப்படைக்கப்பட்டது.

நிகழ்வில் ஆா்எஸ்கே பள்ளி முதல்வா் ஜெயராஜ், முன்னாள் மாணவா்கள் விஜயகாந்தன், வேலுபாண்டியன், முருகேசன், குருசாமி, தாமோதரன், மருத்துவா் சீனிவாசன் உள்ளிட்டோா் பங்கேற்றனா்.

இந்த உற்பத்தி மையம் மூலம் ஒரு நிமிடத்துக்கு 250 லிட்டா் ஆக்சிஜன் உற்பத்தி செய்து அதன் மூலம் சுமாா் 50 நோயாளிகளுக்கு விநியோகிக்க முடியும்.