மக்களவைத் தோ்தலுக்காகவே பிரதமா் நரேந்திர மோடி எரிவாயு உருளையின் விலையை குறைத்துள்ளதாக திருச்சி மக்களவை உறுப்பினா் சு. திருநாவுக்கரசா் வெள்ளிக்கிழமை தெரிவித்தாா். திருச்சியில் காங்கிரஸ் கட்சி அலுவலகத்தில், மாநகராட்சிக்குள்பட்ட 65 வாா்டுகளில் புதிதாக தோ்வு செய்யப்பட்ட கட்சி நிா்வாகிகளுக்கு நியமன கடிதங்கள் வழங்கும் நிகழ்வு வெள்ளிக்கிழமை நடைபெற்றது. இதில், சு. திருநாவுக்கரசா் எம்.பி. பங்கேற்று, புதிய நிா்வாகிகளிடம் நியமன கடிதங்களை வழங்கி பாராட்டு தெரிவித்தாா். பின்னா், செய்தியாளா்களிடம் அவா் கூறியதாவது: திருச்சி மக்களவைத் தொகுதி கடந்தமுறை நான் வென்ற தொகுதி என்ற அடிப்படையிலும், 4 லட்சம் வாக்குகளுக்கு மேல் பெற்று வெற்றி பெற்றேன் என்பதாலும், நானே மீண்டும் போட்டியிட விரும்புகிறேன். காங்கிரஸ் கட்சிக்கு திருச்சி தொகுதியை ஒதுக்குவது குறித்து திமுக தலைமையும், காங்கிரஸ் தலைமையும் முடிவு செய்யும். மக்களவைத் தோ்தல் நெருங்கிவரும் நிலையில், சமையல் எரிவாயு உருளையின் விலையை குறைத்து, தோ்தல் ஆதாயம் தேட முயன்றுள்ளாா் பிரதமா் நரேந்திர மோடி. அவா் தமிழகத்துக்கு எத்தனை முறை வந்தாலும் பாஜக-வுக்கு முன்னேற்றமும் கிடையாது; மாற்றமும் கிடையாது என்றாா் அவா்.