சிலந்தி ஆற்றின் குறுக்கே தடுப்பணை கட்டுவது சட்ட விரோதம் -ஓ. பன்னீா்செல்வம்

திருச்சி, மே 23: சிலந்தி ஆற்றின் குறுக்கே தடுப்பணை கட்டுவது சட்ட விரோத நடவடிக்கை என தமிழக முன்னாள் முதல்வரும், அதிமுக தொண்டா்கள் உரிமை மீட்புக் குழுத் தலைவருமான ஓ. பன்னீா்செல்வம் தெரிவித்தாா்.

பெரும்பிடு முத்தரையா் சதய விழாவில் பங்கேற்க திருச்சிக்கு வியாழக்கிழமை வந்த அவா், செய்தியாளா்களிடம் கூறியது: அமராவதி என்பது காவிரியின் துணை நதியாகும். மேலும், அமராவதி அணையிலிருந்து திறந்துவிடப்படும் உபரி நீரும் காவிரியில்தான் கலக்கிறது. எனவே, அதுவும் காவிரி நடுவா் மன்றத் தீா்ப்புக்குள்பட்டதுதான். எனவே, காவிரிக்கு வரும் தண்ணீரை யாா் தடுத்தாலும் ஏற்றுக் கொள்ள முடியாது.

மேக்கேதாட்டு பகுதியில் கா்நாடகம் அணை கட்டுவதாக இருந்தாலும், சிலந்தி ஆற்றின் குறுக்கே கேரளம் அணை கட்டுவதாக இருந்தாலும் அது சட்டவிரோதமான நடவடிக்கையாகவே அமையும் என்றாா்.

மக்களவைத் தோ்தல் முடிவுக்குப் பிறகு அதிமுக ஒன்றுபடுமா? என்ற கேள்விக்கு பதில் அளிக்கையில், அந்த விவகாரம் தனியாக விவாதிக்கப்பட வேண்டியது என்றாா்.